Raja Shivaji: राजा शिवाजी चित्रपटातील अंगावर काटा आणणारं छत्रपती अँथम, नाशिक ढोलच्या साथीने अजय-अतुलने रोमांच उभा केला!
या BTS व्हिडिओमधून चित्रपटाच्या निर्मितीची भव्यता, संगीताची ताकद आणि संपूर्ण टीमची मेहनत यांची एक झलक पाहायला मिळते, ज्यामुळे या ऐतिहासिक महाकाव्याबद्दलची अपेक्षा अधिकच वाढली आहे.
Raja Shivaji: 'जिओ स्टुडिओज' आणि 'मुंबई फिल्म कंपनी'कडून सादर होत असलेल्या 'राजा शिवाजी' या बहुप्रतिक्षित ऐतिहासिक चित्रपटाबाबत प्रेक्षकांमध्ये निर्माण झालेली उत्सुकता आता आणखी शिगेला पोहोचली आहे. अलीकडेच चित्रपटाचे प्रभावी पोस्टर प्रदर्शित करून चर्चेचा विषय ठरलेल्या निर्मात्यांनी, आता चित्रपटातील ‘राजा शिवाजी अँथम’ अर्थात “छत्रपती” या गीताचा चित्रीकरणामागील (BTS) एक भव्य आणि ऊर्जा देणारा व्हिडिओ प्रदर्शित केला आहे. या BTS व्हिडिओमधून चित्रपटाच्या निर्मितीची भव्यता, संगीताची ताकद आणि संपूर्ण टीमची मेहनत यांची एक झलक पाहायला मिळते, ज्यामुळे या ऐतिहासिक महाकाव्याबद्दलची अपेक्षा अधिकच वाढली आहे.
अंगावर काटा आणणारं छत्रपती अँथम
या चित्रपटातील हे गीत सुप्रसिद्ध संगीतकार जोडी अजय-अतुल यांनी संगीतबद्ध केले असून, त्यांनीच ते आपल्या दमदार आवाजात सादर केले आहे. या गीताच्या BTS व्हिडिओमध्ये मोठ्या पडद्यावरील अनुभव अधिक प्रभावी करण्यासाठी तयार करण्यात आलेल्या भव्य, शक्तिशाली आणि उत्तुंग अशा संगीत रचनेची स्पष्ट झलक दिसून येते. प्रत्येक बीट, प्रत्येक स्वर आणि प्रत्येक दृश्यामागे बारकाईने केलेली मेहनत या व्हिडिओतून जाणवते. याआधी या गीताचा मुखडा (Chorus) प्रदर्शित झाला होता आणि प्रेक्षकांनी त्याला मोठ्या उत्साहाने प्रतिसाद दिला होता; आता संपूर्ण गाण्याची उत्सुकता शिगेला पोहोचली आहे.
‘राजा शिवाजी अँथम’ “छत्रपती” हे १३ एप्रिल रोजी प्रदर्शित होणार असून, या गीतातून हिंदवी स्वराज्याचा आत्मा, शौर्य आणि प्रेरणा नव्या पिढीपर्यंत प्रभावीपणे पोहोचवण्याचा प्रयत्न करण्यात आला आहे. संगीत, दृश्यरचना आणि भावनिक उंची यांचा संगम असलेले हे गीत चित्रपटाचा आत्मा ठरणार असल्याची सर्वत्र चर्चा आहे.
दमदार स्टारकास्ट
या महत्त्वाकांक्षी चित्रपटाचे दिग्दर्शन रितेश विलासराव देशमुख यांनी केले असून, त्यांनीच लेखक, निर्माता आणि छत्रपती शिवाजी महाराजांची भूमिका साकारत तिहेरी जबाबदारी समर्थपणे सांभाळली आहे. त्यांच्या या बहुआयामी भूमिकेमुळे चित्रपटाला एक वेगळीच उंची मिळणार असल्याचे स्पष्ट दिसते. चित्रपटात संजय दत्त, अभिषेक बच्चन, विद्या बालन, महेश मांजरेकर, सचिन खेडेकर, बोमन इराणी, भाग्यश्री, फरदीन खान, जितेंद्र जोशी, अमोल गुप्ते आणि जिनिलिया देशमुख यांसारख्या दिग्गज कलाकारांचा समावेश असलेला एक भक्कम कलाकार संच पाहायला मिळणार आहे.
कधी होणार चित्रपट प्रदर्शित?
'जिओ स्टुडिओज' प्रस्तुत आणि 'मुंबई फिल्म कंपनी' निर्मित या चित्रपटाची निर्मिती ज्योती देशपांडे आणि जिनिलिया देशमुख यांनी केली आहे. छत्रपती शिवाजी महाराजांच्या जीवनावर आणि आधारित राजा शिवाजी १ मे २०२६ रोजी जगभरातील चित्रपटगृहांमध्ये मराठी आणि हिंदी या दोन्ही भाषांमध्ये प्रदर्शित होणार आहे.एकूणच, “राजा शिवाजी” हा चित्रपट केवळ एक सिनेमा नसून, तो भारतीय इतिहासाचा गौरवशाली अध्याय मोठ्या पडद्यावर सजीव करणारा एक भव्य अनुभव ठरणार आहे. ‘राजा शिवाजी अँथम’ “छत्रपती” या गाण्याच्या माध्यमातून प्रेक्षकांना या ऐतिहासिक प्रवासाची एक प्रभावी झलक मिळाली असून, आता संपूर्ण चित्रपटाची प्रतीक्षा अधिकच उत्कंठावर्धक झाली आहे.
महत्त्वाच्या बातम्या
