ST Bus Brand Ambassador: 'लालपरी'ला मिळणार नवं ग्लॅमर! रितेश- जिनिलिया STचे ब्रॅण्ड अॅम्बेसिडर, याआधी कोणते कलाकार होते?
ग्रामीण आणि शहरी भागातील प्रवाशांपर्यंत एसटीची सेवा अधिक प्रभावीपणे पोहोचवण्याचा हा प्रयत्न असल्याचं सांगितलं जातंय.
ST Bus Brand Ambassador: महाराष्ट्राची ‘लालपरी’ म्हणून ओळखल्या जाणाऱ्या राज्य परिवहन महामंडळाला आता नव्या चेहऱ्यांची साथ मिळणार आहे. मराठमोळा अभिनेता रितेश देशमुख (Riteish Deshmukh) आणि अभिनेत्री जेनेलिया देशमुख (Genelia Deshmukh) यांची एसटी महामंडळाच्या ब्रॅण्ड ॲम्बेसिटर म्हणून निवड करण्यात आली आहे. प्रवाशांना सार्वजनिक वाहतुकीचा वापर करण्यासाठी आकर्षित करण्यासाठी आणि एसटीची प्रतिमा अधिक आधुनिक व आकर्षक करण्याच्या उद्देशाने हा निर्णय घेण्यात आला आहे. (MSRTC Brand Ambassador)
पाच वर्षांसाठी करार, लवकरच अधिकृत घोषणा
परिवहन मंत्री प्रताप सरनाईक येत्या दोन दिवसांत रितेश आणि जिनिलिया यांच्यासोबत अधिकृत करार करणार असल्याची माहिती समोर आली आहे. हा करार पाच वर्षांसाठी असणार असून, या काळात दोघेही एसटीच्या विविध जाहिराती, प्रचार मोहिमा आणि सामाजिक उपक्रमांमध्ये सहभागी होताना दिसतील. ग्रामीण आणि शहरी भागातील प्रवाशांपर्यंत एसटीची सेवा अधिक प्रभावीपणे पोहोचवण्याचा हा प्रयत्न असल्याचं सांगितलं जातंय.
याआधीही मराठी कलाकारांची साथ
एसटी महामंडळासाठी प्रसिद्ध कलाकारांना ब्रॅण्ड अॅम्बेसिडर म्हणून निवडण्यात आलेलं. याआधी मकरंद अनासपुरे आणि दिवंगत विक्रम गोखले यांनी ही जबाबदारी सांभाळली होती. त्यांच्या माध्यमातून एसटीला एक वेगळी ओळख मिळाली होती. आता रितेश आणि जिनिलियाच्या लोकप्रियतेचा फायदा घेत एसटी महामंडळ नव्या पिढीपर्यंत पोहोचण्याचा प्रयत्न करत आहे. सोशल मीडियावरही या निर्णयाची चर्चा रंगली असून, चाहत्यांमध्ये उत्सुकता निर्माण झाली आहे. येत्या काळात या जोडीला ‘लालपरी’च्या प्रचारासाठी विविध कार्यक्रम आणि मोहिमांमध्ये पाहायला मिळणार आहे.
रितेश-जिनेलियाच्या धाकट्या लेकाचं इंडस्ट्रीत दणक्यात पदार्पण
'राजा शिवाजी'च्या निमित्तानं रितेश आणि जिनेलियाच्या आयुष्यात आणखी एक महत्त्वाची गोष्ट घडणार आहे. या सिनेमात रितेश-जिनेलिया स्वतः झळकणार आहेतच, पण त्यासोबतच त्यांचा धाकटा लेकही सिनेमात झळकणार आहे. 'राजा शिवाजी' हा सिनेमा रितेश देशमुख आणि जिनेलिया यांच्यासाठी अनेक कारणांमुळे खास ठरला आहे. या सिनेमात रितेश देशमुख स्वतः छत्रपती शिवाजी महाराज यांच्या भूमिकेत झळकणार आहे. तर, या सिनेमाची निर्मिती, दिग्दर्शनही स्वतः रितेश देशमुख यानंच केलंय. तर, जिनेलिया या सिनेमात महाराणी सईबाईंच्या भूमिकेत झळकणार आहे. पण, हा सिनेमा आणखी एका कारणानं रितेश-जिनेलियासाठी खास ठरलाय. या सिनेमातून रितेशचा धाकटा मुलगा राहिल देशमुख (Rahyl Deshmukh) हादेखील सिनेसृष्टीत पदार्पण करतोय.
महत्त्वाच्या बातम्या
