Governor trailer Out: मनोज वाजपेयींच्या ‘गव्हर्नर’च्या जबरदस्त ट्रेलरची प्रचंड चर्चा ; 2 मिनिट 54 सेकंदांचा थरार पाहून प्रेक्षक थक्क

संकटातून देशाला बाहेर काढण्यासाठी आणि भारताला आर्थिकदृष्ट्या कोसळण्यापासून वाचवण्यासाठी जे ऐतिहासिक निर्णय घेण्यात आले, त्याभोवती या चित्रपटाची कथा फिरताना दिसते.

Governer trailer

Source : abp majha

Governor Trailer Out: ‘द केरळ स्टोरी’ आणि ‘द केरळ स्टोरी 2’चे निर्माते आता आणखी एका सत्य घटनांवर आधारित कथा घेऊन प्रेक्षकांसमोर येत आहेत. 1990 मध्ये भारतावर आलेल्या आर्थिक संकटाच्या पार्श्वभूमीवर आधारित ‘गव्हर्नर: द सायलेंट सेव्हियर’ या चित्रपटाचा ट्रेलर आज रिलीज झाला आहे. अभिनेता मनोज बाजपेयी प्रमुख भूमिकेत असलेल्या या चित्रपटात भारताच्या इतिहासातील अत्यंत कठीण काळ दाखवण्यात आला आहे.

ट्रेलरमध्ये काय खास?

2 मिनिटे 54 सेकंदांच्या या ट्रेलरची सुरुवात 1990 च्या त्या काळापासून होते, जेव्हा भारत गंभीर आर्थिक संकटाचा सामना करत होता. देश दिवाळखोरीच्या उंबरठ्यावर पोहोचला होता. चित्रपटात मनोज बाजपेयी यांची भूमिका माजी RBI गव्हर्नर एस. वेंकटरमणन यांच्या व्यक्तिमत्त्वावर आधारित असल्याचं दाखवण्यात आलं आहे. ट्रेलरमध्ये देशाची ढासळणारी आर्थिक स्थिती, त्यातून जनतेमध्ये निर्माण झालेला संताप आणि रस्त्यावर माजलेला गोंधळ प्रभावीपणे दाखवण्यात आला आहे. या संकटातून देशाला बाहेर काढण्यासाठी आणि भारताला आर्थिकदृष्ट्या कोसळण्यापासून वाचवण्यासाठी जे ऐतिहासिक निर्णय घेण्यात आले, त्याभोवती या चित्रपटाची कथा फिरताना दिसते.

ट्रेलरमध्ये चित्रपट सत्य घटनांपासून प्रेरित असल्याचं सांगण्यात आलं आहे. मनोज बाजपेयी यांचं पात्र देशाला आर्थिक संकटातून बाहेर काढण्यासाठी प्रयत्न करताना दिसतं. यासाठी देशातील सोने परदेशात पाठवण्याचा एक गुप्त प्लॅन तयार केला जात असल्याचंही ट्रेलरमध्ये दाखवण्यात आलं आहे.

मनोज बाजपेयींचा वेगळाच अंदाज

‘गव्हर्नर’मध्ये मनोज बाजपेयी अतिशय गंभीर आणि कठोर RBI गव्हर्नरच्या भूमिकेत दिसणार आहेत. त्यांच्या करिअरमध्ये पहिल्यांदाच ते अशा प्रकारच्या भूमिकेत मोठ्या पडद्यावर झळकणार आहेत. या चित्रपटात अभिनेत्री अदा शर्मा देखील महत्त्वाच्या भूमिकेत दिसणार आहे. ट्रेलर पाहता ती पत्रकाराच्या भूमिकेत असल्याचं समजतं. ट्रेलरमध्ये अनेक दमदार डायलॉग्सही ऐकायला मिळतात.

‘गव्हर्नर’ कधी रिलीज होणार?

दिग्दर्शक चिन्मय मांडलेकर यांनी दिग्दर्शित केलेल्या या चित्रपटाची कथा सुवेंदू भट्टाचार्य, सौरभ भारत, रवी असरानी आणि विपुल अमृतलाल शाह यांनी मिळून लिहिली आहे. चित्रपटातील गाणी जावेद अख्तर यांनी लिहिली असून संगीत अमित त्रिवेदी यांनी दिलं आहे. ‘गव्हर्नर: द सायलेंट सेव्हियर’ हा चित्रपट 12 जून रोजी सिनेमागृहांमध्ये प्रदर्शित होणार आहे.