Superhit Doordarshan Show: 42 वर्षांपूर्वी दूरदर्शनवर आलेला पहिला सुपरहिट कॉमेडी शो; मोठमोठ्या सिनेमांनाही दिलेली टक्कर! मालिकेचं टायटल साँग किशोर कुमारांनी गायलेलं
या मालिकेची लोकप्रियता केवळ भारतापुरती मर्यादित राहिली नाही. लंडनमध्येही ‘ये जो है जिंदगी’चे चाहते मोठ्या संख्येने होते.

Doordarshan show: एक काळ असा होता, जेव्हा मनोरंजनासाठी प्रेक्षकांसमोर दूरदर्शन हाच प्रमुख पर्याय होता. आजच्या काळात असंख्य टीव्ही चॅनेल्स आणि ओटीटी प्लॅटफॉर्म उपलब्ध असले, तरी एकेकाळी दूरदर्शनवरील मालिका घराघरात आवर्जून पाहिल्या जायच्या. याच काळात 1984 मध्ये ‘ये जो है जिंदगी’ हा शो प्रेक्षकांच्या भेटीला आला आणि त्याने लोकप्रियतेचे अनेक विक्रम केले.
‘ये जो है जिंदगी’ हा भारतातील पहिल्या लोकप्रिय कॉमेडी सिटकॉमपैकी एक मानला जातो. या मालिकेत सतीश शाह, राकेश बेदी, शफी इनामदार आणि स्वरूप संपत यांच्या प्रमुख भूमिका होत्या. प्रसिद्ध लेखक शरद जोशी यांनी मालिकेचे लेखन केले होते. तर कुंदन शाह, मंजुल सिन्हा आणि रमन कुमार यांनी दिग्दर्शनाची जबाबदारी सांभाळली होती.
सिनेमांच्या कमाईवरही झाला परिणाम!
या मालिकेची लोकप्रियता इतकी वाढली होती की त्याचा परिणाम चित्रपटांच्या व्यवसायावरही होत असल्याचे सांगितले जाते. ‘ये जो है जिंदगी’चा प्रसारणाचा दिवस आणि वेळ प्रेक्षकांसाठी विशेष ठरला होता. शुक्रवारी रात्री लोक मोठ्या संख्येने हा कार्यक्रम पाहण्यासाठी घरात थांबत असत. त्यामुळे त्या काळातील सिनेमांच्या शोला जाणाऱ्या प्रेक्षकांच्या संख्येवर परिणाम होत असल्याचे म्हटले जाते.
61 भागांची मालिका, परदेशातही लोकप्रिय
1984 मध्ये सुरू झालेल्या या मालिकेचे एकूण 61 भाग प्रसारित झाले. मालिकेचे टायटल साँग प्रसिद्ध गायक किशोर कुमार यांनी गायले होते आणि तेही प्रचंड लोकप्रिय झाले.या मालिकेची लोकप्रियता केवळ भारतापुरती मर्यादित राहिली नाही. लंडनमध्येही ‘ये जो है जिंदगी’चे चाहते मोठ्या संख्येने होते. मालिकेच्या टेपची प्रत मिळण्याची प्रेक्षक आतुरतेने वाट पाहत असत, असा उल्लेख स्वरूप संपत यांनी एका मुलाखतीत केला होता.
मध्यमवर्गीय कुटुंबाच्या दैनंदिन आयुष्याभोवती फिरणाऱ्या या मालिकेतील विनोद आणि पात्रे प्रेक्षकांच्या मनात घर करून गेली. 42 वर्षांनंतरही ‘ये जो है जिंदगी’ची आठवण आवर्जून काढली जाते. दूरदर्शनच्या सुवर्णकाळातील हा शो आजही भारतीय टेलिव्हिजनच्या इतिहासातील एक महत्त्वाचा टप्पा मानला जातो.





















