Devkhel Web Series: 'प्रोमो तात्काळ हटवा अन्यथा कार्यालय फोडू...'; Zee5 वरील 'देवखेळ' वेब सीरिजविरोधात धार्मिक भावना भडकवल्याचा आरोप
Devkhel Web Series: आपलं गुहागर या सामाजिक व्यासपीठाच्या वतीनं गुहागर पोलीस ठाण्यात BNS आणि माहिती तंत्रज्ञान कायद्यांतर्गत कायदेशीर तक्रार दाखल करण्यात आली आहे.
Devkhel Web Series: Zee5 या OTT प्लॅटफॉर्मवरील 'देवखेळ' वेब सीरिजच्या (Devkhel Web Series) टीझरमधून गुहागर परिसरातील श्रद्धास्थान असलेल्या शंकासूर (Sankasur) देवाबाबत अपमानास्पद आणि धार्मिक भावना दुखावणारा मजकूर प्रसारित करण्यात आल्याचा गंभीर आरोप करण्यात आला आहे. सध्या सुरू असलेले प्रोमो तात्काळ हटवा अन्यथा कार्यालयापर्यंत येऊ, असा इशाराही गुहागरमधील नागरिकांनी दिला आहे. यासंदर्भात गुहागर पोलीस स्थानकात देखील लेखी स्वरूपात तक्रार देऊन कायदेशीर कारवाईची मागणी करण्यात आली आहे.
आपलं गुहागर या सामाजिक व्यासपीठाच्या वतीनं गुहागर पोलीस ठाण्यात BNS आणि माहिती तंत्रज्ञान कायद्यांतर्गत कायदेशीर तक्रार दाखल करण्यात आली आहे. ही तक्रार ॲड. संकेत अरुण साळवी, प्रेसिडेंट – गुहागर बार असोसिएशन आणि आपलं गुहागरचे समन्वयक यांनी दिनांक 28 जानेवारी 2026 रोजी गुहागर पोलीस निरीक्षकांकडे सादर केली आहे.
तक्रारीनुसार, 'देवखेळ' वेब सीरिजच्या टीझरमध्ये शंकासुर देवाला क्रूर, अमानवी आणि अंधश्रद्धेशी जोडलेला देव म्हणून दाखवण्याचा प्रयत्न करण्यात आला आहे. विशेषतः "शंकासूर शिक्षा करतो, बळी घेतो", "होळीत दरवर्षी खून करण्याची प्रथा आहे", अशा संवादांमुळे भाविक वर्गाच्या धार्मिक भावना दुखावल्या गेल्याचा आरोप आहे. शंकासूर देव हे गुहागर परिसरातील प्राचीन श्रद्धास्थान असून, शिमगोत्सव काळात हजारो भाविक श्रद्धेनं उपासना करतात.
दरम्यान, Zee5 Marathi च्या अधिकृत युट्युब चॅनेलवर 21 जानेवारी 2026 रोजी प्रसिद्ध झालेल्या ट्रेलरला आतापर्यंत 8 लाखांहून अधिक व्ह्यूज मिळाल्यानं हा आक्षेपार्ह मजकूर देशभर प्रसारित झाल्याचंही तक्रारीत नमूद करण्यात आलं आहे. या प्रकरणामुळे समाजात असंतोष निर्माण झाला असून, कायदा आणि सुव्यवस्थेचा प्रश्न निर्माण झाल्याचा दावा करण्यात आला आहे.
महत्त्वाच्या बातम्या
