रोहित शेट्टी घरावरील गोळीबार प्रकरणात मुख्यमंत्र्यांकडून सभागृहात मोठी माहिती; भाजप आमदारालाही धमकीचे फोन, नेमकं काय घडलं?
Rohit Shetty Residence Attack: रोहित शेट्टीच्या घरावर गोळीबाराची घटना. अधिवेशनात मुख्यमंत्री देवेंद्र फडणवीस यांनी दिली तपासाची माहिती.
CM Devendra fadnavis on Rohit Shetty: प्रसिद्ध बॉलिवूड दिग्दर्शक रोहित शेट्टीच्या घरावर अज्ञाताकडून झालेल्या गोळीबार प्रकरणात अनेक धागेदोरे सापडत आहे. पोलिसांकडून चौकशी सुरू आहे. आतापर्यंत या प्रकरणात पोलिसांनी 13 जणांना अटक केली आहे. तसेच त्यांच्यावर मकोका लावण्यात आला आहे. शुभम लोणकरच्या भावालाही ताब्यात घेण्यात आलं आहे. दरम्यान, या प्रकरणाबाबत आज अधिवेशनात मुख्यमंत्री देवेंद्र फडणवीस यांनी सभागृहात रोहित शेट्टीच्या घरावरील गोळीबार प्रकरणात तपासाची बाजू आणि केलेल्या कारवाईंबाबत माहिती दिली.
विधीमंडळात राज्याचं अर्थसंकल्पीय अधिवेशन सुरू आहे. सभागृहात रोहित शेट्टी घरावरील गोळीबार प्रकरणी चर्चा झाली. यावेळी शिवसेना ठाकरे गटाचे आमदार मिलिंद नार्वेकर यांनी विधानपरिषदेत दिग्दर्शक रोहित शेट्टी यांच्या घरावर झालेल्या हल्ल्याबाबत प्रश्न विचारला. सरकारने दिलेल्या लेखी उत्तरावर आपण समाधानी असून, हा विषय वाढवत नसल्याचे मिलिंद नार्वेकर यांनी सांगितलं. यानंतर सभागृहात मुख्यमंत्री देवेंद्र फडणवीस यांनी बाक वाजवून त्यांच्या वक्तव्याचे स्वागत केले.
परंतु, ठाकरे गटाचे सचिन अहिर, अनिल परब यांनी, मिलिंद नार्वेकर यांचे समाधान झाले असले तरी आमचे समाधान झाले नसल्याचे सांगत हा मुद्दा उचलून धरला. दरम्यान, एकाच पक्षातील आमदारांची वेगवेगळी भूमिका या निमित्ताने समोर आली. यावेळी मुख्यमंत्री देवेंद्र फडणवीस यांनी या प्रकरणी केलेल्या कारवाईंबाबत सभागृहात माहिती दिली. मुख्यमंत्री म्हणाले, 'दिग्दर्शक रोहित शेट्टी यांच्या इमारतीवर एका अज्ञाताने गोळीबार केला होता. मुंबई पोलिसांनी 13 आरोपींना ताब्यात घेतलं. मकोका त्यांच्यावर लावण्यात आला. बिष्णोईचा महाराष्ट्रातील ऑपरेटर शुभम लोणकर याच्या भावाला अटक झाली. शुभम लोणकरवरही योग्य कारवाई केली जाईल. तो सध्या परदेशात बसून फोन करून धमक्या देतोय. आधी काँग्रेस पक्षातील आमदाराला फोन करुन धमकी दिली. आता भाजप आमदाराला देखील त्याने धमकीचा फोन केला आहे', अशी माहिती त्यांनी दिली.
सभागृहात देवेंद्र फडणवीस नेमकं काय म्हणाले?
'बॉलिवूड दिग्दर्शक रोहित शेट्टीच्या निवासस्थानी असलेल्या टॉवरच्या भिंतीवर एका व्यक्तीनं गोळीबार केला आणि फरार झाला. आपण या प्रकरणी गुन्हा नोंदवून घेतला आहे. पोलिसांनी तपास करुन 13 आरोपींना अटक केली. आरोपींवर मकोका लावण्यात आला आहे. मुख्य म्हणजे शुभम लोणकरच्या भावालाही अटक करण्यात आली आहे. शुभम लोणकर सध्या परदेशात आहे. त्याला देखील लवकरात लवकर अटक करु', असे आश्वासन यावेळी फडणवील यांनी दिले.
एनआयएच्या माध्यमातून अनमोल बिष्णोईला अटक करण्यात आली आहे. चौकशीसाठी त्याला मुंबईत आणावं, अशी मागणी आम्ही केंद्राकडे केली आहे', असं देवेंद्र फडणवीस यांनी स्पष्ट केलं. 'लोणकर हा अकोला जिल्ह्यातील रहिवाली आहे. आमच्या भाजप आमदाराकडे इतका पैसा नाही. ते गरीब असून, त्यांना देखील फोन केला. जिथे जिथे त्यांनी हे कृत्य केलं आहे. तिथे पोलिसांनी योग्य ती कारवाई केली आहे. मी यावेळी सभागृहाला असे आश्वासन देतो की, गँगवॉर होणार नाही', असं देवेंद्र फडणवीस म्हणाले.
महत्त्वाच्या बातम्या
