तीन दिवसांत 'जुडवा 2'ची बॉक्स ऑफिसवर दमदार कमाई

तीन दिवसांच्या कमाईच्या बाबतीत ‘जुडवा-2’ ने या वर्षी सर्वाधिक कमाई करणाऱ्या चित्रपटांच्या यादीत तिसरं स्थान मिळवलं आहे.

मुंबई : बॉलिवूड अभिनेता वरुण धवनच्या ‘जुडवा-2’ चित्रपटाला प्रेक्षकांचा चांगला प्रतिसाद मिळत आहे. ओपनिंग विकेण्डला चित्रपटाने दमदार कमाई केली आहे. तीन दिवसांच्या कमाईच्या बाबतीत ‘जुडवा-2’ ने या वर्षी सर्वाधिक कमाई करणाऱ्या चित्रपटांच्या यादीत तिसरं स्थान मिळवलं आहे. ‘जुडवा-2’ ने प्रदर्शनानंतर तीन दिवसांत 59 कोटींचा गल्ला जमवला आहे. भारतात हा चित्रपट 3500 थिएटरमध्ये रिलीज झाला होता. ट्रेड अॅनालिस्ट तरण आदर्श यांनी ट्विटरवर सिनेमाच्या कमाईची माहिती दिली आहे. "पहिल्या दिवशी सिनेमाने 16.10 कोटी रुपये, दुसऱ्या दिवशी 20.55 कोटी आणि तिसऱ्या दिवशी 22.60 कोटी रुपयांची कमाई केली. अशाप्रकारे सिनेमाने तीन दिवसात एकूण 59.25 कोटींची कमाई केली आहे,"असं ट्वीट तरण आदर्श यांनी केलं आहे. यासोबतच विश्लेषकांनी हा सिनेमा सुपरहिट असल्याचं जाहीर केलं आहे. https://twitter.com/taran_adarsh/status/914736553062289408 प्रेक्षकांकडून मिळत असलेला प्रतिसाद पाहून वरुण धवन फारच खूश आहे. धवनने रविवारी ट्वीट केला होता की, “जुडवा-2’ डेव्हिड धवन यांनी दिग्दर्शित केलेला 44वा चित्रपट आहे.  कलाकार म्हणून मी फार आनंदी आहे. शिवाय मुलगा म्हणून मला अतिशय अभिमान वाटतोय. त्यांना आपल्या प्रेक्षकांची नस माहित आहे आणि त्यांचे आभारी आहेत.” https://twitter.com/Varun_dvn/status/914362322243674112 ‘जुडवा-2’ हा 1997 मध्ये आलेल्या सलमान खानच्या ‘जुडवा’चा रिमेक आहे. हा चित्रपट वरुण धवनचे वडील डेव्हिड धवन यांनी दिग्दर्शिक केला होता. चित्रपटात वरुण धवन डबल रोलमध्ये आहे. त्याच्यासोबत जॅकलीन फर्नांडिस आणि तापसी पन्नू मुख्य भूमिकेत आहेत.