सिंगल असल्याने या अभिनेत्रीला सोसायटीने घरातून बाहेर काढलं!

मुंबई : अभिनेता टायगर श्रॉफच्या अपकमिंग सिनेमातील अभिनेत्री निधी अग्रवालला सोसायटीने घरातून बाहेर काढल्याची माहिती आहे. दोघे मुन्ना मायकल या सिनेमात एकत्र दिसणार आहेत. निधी घरात एकटी राहते, शिवाय ती सिनेमात काम करते, त्यामुळे तिला वांद्रे येथील घर सोडण्यास सोसायटीने भाग पाडलं. मुंबईसारख्या शहरात घडलेल्या या घटनेने एकच खळबळ माजली आहे. आपण सिंगल राहत असल्यामुळे सोसायटीने घर सोडण्यास भाग पाडलं, असं निधीने ‘मिड डे’शी बोलताना सांगितलं. यासंबंधीतच आणखी एक वृत्त म्हणजे मुंबईतील अनेक सोसायटींनी सिनेमात काम करणाऱ्या कलाकारांना घर न देण्याचा निर्णय घेतल्याची माहिती आहे. दरम्यान केवळ मुंबईच नव्हे, तर संपूर्ण भारत आणि जगभरात अशा घटना घडतात. वैवाहिक स्थिती, जात, धर्म, स्त्री-पुरुष असा अनेक प्रकारे भेदभाव केला जातो. मुंबईत गेल्या काही दिवसात अशी उदाहरणं समोरही आली आहेत. मुंबईची अशा घटनांच्या बाबतीत जगभरात एक वेगळी ओळख आहे. मुंबईत कुणालाही भेदभावाचा सामना करावा लागत नाही. मात्र एका अभिनेत्रीला घर सोडायला लावल्यामुळे या प्रकाराची सर्वत्र चर्चा आहे.