Sarsenapati Hambirrao : प्रविण तरडेंचा (Pravin Tarde) 'सरसेनापती हंबीरराव'(Sarsenapati Hambirrao) हा सिनेमा आता प्रेक्षकांच्या भेटीला आला आहे. या सिनेमाला प्रेक्षकांचा तुफान प्रतिसाद मिळत आहे. सिनेमा प्रेक्षकांच्या पसंतीस उतरत आहे. अशातच एका प्रेक्षकाने या सिनेमासाठी एक खास ऑफर ठेवली.
'सरसेनापती हंबीरराव' हा सिनेमा पाहिल्यानंतर सिनेमाचे तिकीट दाखवा आणि अर्धा डझन आंबे मोफत मिळवा, अशी खास ऑफर एका इतिहास वेड्या प्रेक्षकाने ठेवली आहे. आपला इतिहास प्रत्येक व्यक्तीपर्यंत पोहोचला पाहिजे, इतिहासाचे महत्त्व समजावे आणि अभिमान वाटावा यासाठीच आंब्याची खास ऑफर देण्यात आली.
10/1 मॉर्डन इमारत, जेबी रोड, कॉटन ग्रीन, मुंबई येथे सकाळी 9 ते संध्याकाळी 5 या वेळेत तिकीट दाखवून अर्धा डझन आंबे प्रेक्षक घरी घेऊन जाऊ शकत होते. या ऑफरला प्रेक्षकांचा चांगलाच प्रतिसाद मिळाला. 27 ते 31 मे पर्यंत ही ऑफर लागू आहे. आता हा सिनेमा पाहण्यासाठी प्रेक्षक सिनेमागृहात तुफान गर्दी करत आहेत.
सिनेमागृहांबाहेर झळकतोय हाऊसफुल्लचा बोर्ड
'सरसेनापती हंबीरराव' या सिनेमात गश्मीर महाजनी छत्रपती शिवाजी महाराजांच्या भूमिकेत आहे. तर प्रविण तरडे स्वतः ‘सरसेनापती हंबीररावां’ची भूमिका साकारत आहेत. या सिनेमाची प्रेक्षक आतुरतेनं वाट पाहत होते. आता सिनेमा प्रदर्शित झाला असून प्रेक्षकांच्या पसंतीस उतरत आहे. अनेक सिनेमागृहांबाहेर हाऊसफुल्लचा बोर्ड झळकत आहे.
अनेक कलाकारदेखील हा सिनेमा आवर्जून बघत असून, त्यावर आपल्या प्रतिक्रिया देत आहेत.प्रविण विठ्ठल तरडे यांची कथा, पटकथा, संवाद आणि दिग्दर्शन असलेला ‘सरसेनापती हंबीरराव’ हा सिनेमा सध्या सोशल मीडियावर धुमाकूळ घालत आहे. तीन दिवसात या सिनेमाने बॉक्स ऑफिसवर चांगलीच कमाई केली आहे.
संबंधित बातम्या