'ठाकरे' सिनेमा सेन्सॉर बोर्डाच्या कचाट्यात

सेन्सॉर बोर्डाने चित्रपटातील तीन दृश्य आणि काही संवादांवर आक्षेप घेतला आहे. सेन्सॉर बोर्डाच्या आक्षेपानंतर चित्रपटाचा ट्रेलर ठरल्याप्रमाणे वेळेतच लॉन्च होणार असल्याची रोखठोक भूमिका खासदार संजय राऊत यांनी घेतली आहे.

मुंबई : शिवसेनाप्रमुख बाळासाहेब ठाकरे यांच्या जीवनप्रवासावर आधारित बहुचर्चित 'ठाकरे' सिनेमाचा ट्रेलर आज दुपारी दीड वाजता लॉन्च होणार आहे. मात्र ट्रेलर लॉन्च पूर्वीच हा सिनेमा वादात सापडला आहे. सिनेमातील काही दृश्य आणि संवादावर सेन्सॉर बोर्डानं आक्षेप घेतला आहे.

ठाकरे सिनेमातील तीन दृश्य आणि काही संवादांवर सेन्सॉर बोर्डाने आक्षेप घेतला आहे. सेन्सॉर बोर्डाच्या आक्षेपानंतर चित्रपटाचा ट्रेलर ठरल्याप्रमाणे वेळेतच लॉन्च होणार असल्याची रोखठोक भूमिका खासदार संजय राऊत यांनी घेतली आहे. त्यामुळे सेन्सॉर बोर्ड आणि शिवसेना समोरासमोर आल्याचं चित्र निर्माण झालं आहे.

शिवसेना प्रमुख बाळासाहेब ठाकरेंची भाषणाची आपली खास शैली होती. बाळासाहेब अनेकदा आपल्या भाषणात शिवराळ भाषेचा वापर करत असे. 'ठाकरे' सिनेमातही बाळासाहेबांच्या भाषणाची काही दृश्ये आहेत, त्या भाषेवर सेन्सॉर बोर्डनं आक्षेप घेतल्याचं बोललं जात आहे.

याशिवाय वादग्रस्त बाबरी मशिद प्रकरणीही काही दृश्य सिनेमात दाखवण्यात आली आहेत. बाबरी मशिद प्ररकणातील या दृश्यांमुळे आगामी काळात वाद निर्माण होऊ शकतो. हा वाद निर्माण होऊ नये यासाठी खबरदारीचा उपाय म्हणून म्हणून सेन्सॉर बोर्डानं या आशयाच्या काही दृश्यांवर आक्षेप घेतल्याची माहिती सूत्रांककडून मिळत आहे.

शिवसेना आणि सेन्सॉर बोर्ड यांच्यात या मुद्द्यांवरुन चर्चा सुरु आहे. मात्र शिवसेनेचा आक्रमक पवित्रा पाहता सेन्सॉर बोर्डाने घेतलेल्या आक्षेपांना शिवसेना जुमानणार का? आणि सिनेमातील दृश्यांवर कात्री लागणार का?  हे पाहावं लागणार आहे.

‘ठाकरे’ या सिनेमाचा ट्रेलर आज, 26 डिसेंबर रोजी कार्निव्हल आयमॅक्स वडाळा येथे प्रदर्शित होणार आहे. शिवसेना पक्षप्रमुख उद्धव ठाकरे आणि शिवसेना नेते, युवासेना प्रमुख आदित्य ठाकरे यांच्या प्रमुख उपस्थितीत हा शानदार सोहळा रंगणार आहे.