प्राची देसाईचा नैसर्गिक फंडा, पुण्यात सेंद्रीय शेती करणार

मुंबई : बॉलिवूडमधील सुप्रसिद्ध अभिनेत्री प्राची देसाईच्या 'अझर'मधील भूमिकेचं कौतुक आहे. मात्र या हरहुन्नरी अभिनेत्रीला अभिनयाव्यतिरिक्त शेतीचीही आवड असल्याचं समोर आलं आहे. प्राचीला तिच्या फार्म हाऊसवर सेंद्रिय शेती करण्याची इच्छा आहे.   पुण्याजवळ देसाई कुटुंबाचा एक प्लॉट आहे. या जागेवर भाज्यांची शेती करण्याची सर्वतोपरी जबाबदारी प्राचीने उचलली आहे. विशेष म्हणजे सेंद्रिय पद्धतीने शेती करण्याकडे प्राचीचा भर असणार आहे.   आरोग्यदायी लाईफस्टाईलकडे प्राची देसाईचा ओढा असल्यामुळे स्वतःच सेंद्रिय शेती करुन योग्य तो आहार घेण्याकडे तिचा कल आहे. विशेष म्हणजे शेतीसाठी नोकर ठेवण्याऐवजी स्वतःच इत्यंभूत माहिती घेऊन शेती करण्याची तिची इच्छा आहे.   प्राची सध्या वेगवेगळ्या प्रकारच्या जमिनी, मातींचे गुणधर्म, कुठल्या भाज्या किंवा फळं कोणत्या हवामानात घ्यावात अशी सर्व माहिती ती तज्ज्ञांकडून घेत आहे. त्यामुळे नजीकच्या काळात प्राचीच्या हाती नांगर दिसल्यास आश्चर्य वाटून घेऊ नका.     अभिनेत्री प्राची देसाईने 2006 मध्ये झी टीव्हीवरील सुप्रसिद्ध कसम से मालिकेतून टीव्ही पदार्पण केलं. त्यानंतर झलक दिखला जामध्येही ती झळकली होती. 2008 मध्ये तिने रॉक ऑन चित्रपटातून बॉलिवूडमध्ये पाऊल ठेवलं. तिचे वन्स अपॉन अ टाईम इन मुंबई, बोलबच्चन, एक व्हिलन, अझर यासारखे चित्रपट गाजले होते.