'टिंग्या' या पुरस्कारप्राप्त चित्रपटाचा दिग्दर्शक मंगेश हाडवळेकडेच या सिनेमाच्या दिग्दर्शनाची धुरा आहे. भूषण कुमार, किशन कुमार, महावीर जैन आणि संजय लीला भन्साळींनी या सिनेमाची निर्मिती केली आहे. संगीताची जबाबदारी संजय लीला भन्साळींकडेच आहे.
मुंबईतल्या एका चाळीमध्ये चित्रपटाचं कथानक घडत असल्याचं ट्रेलरमध्ये दिसतं. सरधोपट सिनेमांप्रमाणे एकमेकांचा तिरस्कार करता करता नायक-नायिका एकमेकांच्या प्रेमात पडतात आणि पुन्हा एकमेकांकडे पाठ फिरवतात.
गणपती, होळी उत्सवाच्या सेलिब्रेशनमधून नाच गाणी दाखवत सिनेमाला 'मराठी टच' देण्याचा प्रयत्न दिसत आहे. 'हमारे लोगो को हटा के हर चीझ पे कब्जा कर रहे है', 'माझं डोकं फिरवू नको' यासारखे डायलॉग मीझानच्या तोंडी ऐकायला मिळतात, पण शोभत नाहीत. त्यामुळे प्रेक्षकांचा कसा प्रतिसाद मिळतो, हे पाहणं उत्सुकतेचं ठरणार आहे. 28 जून 2019 रोजी हा सिनेमा प्रदर्शित होणार आहे.