कुलकर्णी चौकातला देशपांडे.. ब्राह्मणी आडनावांबाबात काय म्हणाले गजेंद्र आहिरे

दिग्दर्शक गजेंद्र अहिरे यांचा कुलकर्णी चौकातला देशपांडे हा मराठी चित्रपट प्रदर्शनाआधीच वादात सापडला आहे. यात चित्रपटातील नावावर ब्राह्मण समाजाने आक्षेप घेतला असून चित्रपट चालू देणार नसल्याचे पत्र दिले आहे. यावर दिग्दर्शक गजेंद्र अहिरे यांनी प्रतिक्रिया दिली आहे.

मुंबई : या शुक्रवारी गजेंद्र अहिरे दिग्दर्शित कुलकर्णी चौकातला देशपांडे हा एक मराठी चित्रपट प्रदर्शित होतो आहे. या चित्रपटात सई ताम्हणकर, निखिल रत्नपारखी, स्पृहा जोशी आदींच्या भूमिका आहेत. चित्रपटाचा ट्रेलर आणि जाहिराती पाहता हा चित्रपट एका धाडसी आणि आपल्या मतांवर ठाम असणाऱ्या गृहिणीवर बेतला असल्याचं कळतं. हा चित्रपट प्रदर्शित होण्याआधीच चित्रपटाच्या नावावरुन वाद सुरु झाले आहेत. या नावात कुलकर्णी आणि देशपांडे अशी दोन विशिष्ट समाजातील नावं असल्यामुळे याला ब्राह्मण समाजाने आक्षेप घेतला. चित्रपट चालू न देण्याबद्दल पत्रं दिली गेली. या चित्रपटाची कथा आणि दिग्दर्शन गजेंद्र आहिरे यांचे आहे. या वादावर दिग्दर्शक शांत होते. मात्र, एबीपी माझाला मुलाखत देताना त्याची सुरुवातच या प्रश्नाने झाल्यानंतर त्यांनी यावर आपली बाजू मांडली. ब्राह्मण संघाने या चित्रपटाच्या नावावर आक्षेप घेतल्यानंतर या सिनेमाबद्दल बरीच चर्चा झडली. मात्र, आपल्या मतावर दिग्दर्शक ठाम आहे. या मुद्द्याला धरुन बोलताना दिग्दर्शक आहिरे म्हणाले, 'या चित्रपटात आक्षेप घेण्यासारखं काहीच नाही. हे सिनेमा पाहिल्यानंतर त्यांच्या लक्षात येईल. उरला प्रश्न आडनावांचा तर विशिष्ट समाजाची जगण्याची, जीवनपद्धतीची आपली अशी पद्धत असते. त्यांच्या जेवणापासून कपडे परिधान करण्यापर्यंत त्या जगण्याचं प्रतिबिंब त्यावर असतं. माझ्या चित्रपटातील व्यक्तिरेखा ब्राह्मण आहे. याचं कारण त्या गोष्टीत आहे. पण यातली गृहिणी बोल्ड असली तरी या चित्रपटात हिडीस, बिभत्स असं काही नाही. उलट स्त्रीयांबद्दलचे अनेक महत्वाचे मुद्दे यात मांडले गेले आहेत. ' दिग्दर्शकाने आपलं म्हणणं मांडलं असलं तरी या संघटनांनी चित्रपट पाहण्यात रस दाखवला होता. त्यांना हा सिनेमा दाखवला का यावर दिग्दर्शक म्हणाले, 'सिनेमा हा व्यवसायाचा भाग आहे. सिनेमा प्रदर्शित होताना त्याला अडचणी आलेल्या कुणाला हव्या असतात? विनाकारण वाद वाढतो हे लक्षात आल्यानंतर आमच्या निर्मात्यांनी हा सिनेमा ब्राह्मण संघटनांच्या प्रतिनिधींना दाखवला. त्यात काही महिला व काही पुरूष होते. त्यांनी सिनेमा पाहिल्यावर काहीच आक्षेप घेतला नाही.' इतरत्रही काही शहरांत हा चित्रपट बॅन करण्याबाबत बोललं जातं आहे. त्यालाही उत्तर देताना दिग्दर्शक आहिरे म्हणाले, त्यांनाही मी हेच सांगेन की त्यांनी आधी सिनेमा बघावा आणि त्यानंतर आपली भूमिका घ्यावी. 17 वर्षात 53 चित्रपट कुलकर्णी चौकातला देशपांडे हा गजेंद्र आहिरे यांचा प्रदर्शित होणारा 53 वा चित्रपट आहे. अवघ्या 17 वर्षात त्यांनी ही मजल मारली आहे. याबद्दल ते म्हणाले, हा माझा 53 वा चित्रपट आहे. अवघ्या 17 वर्षात मी हा टप्पा गाठला आहे. मी केलेल्या अभ्यासात अवघ्या 17 वर्षात 53 चित्रपट केलेला आणि कुणीही पाहिलेला नाही. खरंतर लोक मला हसतात. पण चित्रपट बनवणे हे माझं काम आहे मी ते करतो." विशेष बाब अशी की या 53 चित्रपटांच्या कथाही गजेंद्र यांच्याच आहेत. Copy Marathi Movie | 'कॉपी' मराठी सिनेमा नेमका आहे तरी काय? | ढॅण्टॅढॅण | ABP Majha संबंधित बातम्या :