अक्षयकुमारच्या 'जॉली एलएलबी 2' चित्रपटाचा ट्रेलर रिलीज

मुंबई : बॉलिवूडचा खिलाडी अक्षयकुमारच्या बहुप्रतीक्षित 'जॉली एलएलबी 2' या चित्रपटाचा ट्रेलर रिलीज झाला आहे. या चित्रपटात अक्षय जॉली या वकिलाच्या भूमिकेत आहे. कॉमेडी, अॅक्शन आणि इमोशन यांचा संगम 'जॉली एलएलबी 2'मध्ये  पाहायला मिळेल. अक्षयसोबत हुमा कुरेशी या चित्रपटात दिसणार आहे. 'सलमान खानचं लग्न कधी होईल हे सांगू शकतोस का?' यासारख्या हशा पिकवणाऱ्या डायलॉग्सपासून 'जर प्रेमात आणि युद्धात सारं माफ असेल, तर सीमेवर जवानांचे होणारे शिरच्छेदही कायदेशीर आहेत आणि प्रेमात तरुणींवर होणारे अॅसिडहल्लेही कायदेशीर आहेत' असे टाळ्या मिळवणारे डायलॉग्जही आहेत. #JollyLLb2 हा हॅशटॅग सोशल मीडियावर ट्रेण्ड होत आहे. 'जॉली त्याची सर्वात मोठी केस लढण्यासाठी आला आहे' अशा कॅप्शनसह अक्षयने सिनेमाचा ट्रेलर आणि पोस्टर ट्वीट केले आहेत. ‘जॉली एलएलबी’ या 2013 मधील चित्रपटाचा हा सिक्वेल असून सुभाष कपूर यांनी चित्रपटाचं लेखन दिग्दर्शन केलं आहे. पुढच्या वर्षी 10 फेब्रुवारीला हा चित्रपट रिलीज होणार आहे. पाहा ट्रेलर :