बालिका वधू फेम अविका गौर आता अलिकडे इन्स्टाग्रामवर खूपच अॅक्टिव झाली आहे. अविका नेहमीच आपल्याला आवडतील असे फोटो शेअर करत असते. तिच्या फोटोजला लाईक्सही खूप मिळत असतात. अविकाने अशीच आणखी एक गोष्ट शेअर केली आहे. ती आता रिलेशनशिपमध्ये अडकली आहे. बालिका वधू आता मोठी झाली असून तिने आपल्या आवडीचा जोडीदार निवडला आहे.
टेनिस स्टार सानिया मिर्झा आता नव्या भूमिकेत! वेब सीरिजद्वारे करणार डेब्यू
अविका गौरने इन्स्टाग्रामवर ही माहिती दिली आहे. तिने दोन फोटो आपल्या पोस्टमध्ये शेअर केले असून आपल्या जोडीदाराचं नाव जाहीर केलं आहे. त्याचं नाव आहे मिलिंद चंदवाणी. मिलिंद हा 2019 मधला एम टीव्ही रोडीजचा स्पर्धक होता. गेल्या काही महिन्यांपासून दोघेही डेटिंग करत होते. आता दोघांनीही आपण एकमेकांशी डेट करत असल्याचं कबूल केलं आहे. इन्स्टावर ही पोस्ट शेअर करताना अविका म्हणते, मला माझ्या आयुष्याचा जोडीदार सापडला आहे. हा माणूस माझा आहे. आपल्याला असा जोडीदार हवा असतो जो आपल्यावर विश्वास ठेवतो. आपल्यावर प्रेम करतो. आपल्याला स्फूर्ती देतो. आपल्याला पदोपदी मदत करतो. हे स्वप्न नाहीय. तर हे सत्य आहे. मी अशी प्रार्थना करते की खरंतर आत्ता मी जे काही अनुभवते आहे ते तूही अनुभवावस. तुलाही ते कळावं.
ही पोस्ट करताना अविकाने आपण लग्नही इतक्यात करणार नसल्याचं स्पष्ट केलं आहे. ती त्याच पोस्टमध्ये लिहिते, मी इतकं सगळं लिहिते आहे म्हणजे मी काही लग्न इतक्यात करणार नाहीय. त्याला अजून अवकाश आहे. पण आता लोक काय म्हणतील यासारखे विचार आता मनातून निघून गेले आहेत. म्हणून वाटलं आता ही प्रेमाची बातमी तुम्हाला सांगावी. अविकाने जी पोस्ट शेअर केली आहे, तशीच पोस्ट मिलिंदनेही शेअर केली आहे. त्यानेही त्या दोघांचा एक वेगळा फोटो शेअर करत आपण अविकासोबत बांधलो गेलो आहोत असं सांगितलं आहे. अविका आणि मिलिंदच्या या पोस्टमुळे दोघांच्या फॅन्सना खूपच आनंद झालेला त्यांनी त्यांच्या पोस्टखाली व्यक्त केला आहे.