Bhooth Bangla Movie Poster Release : बॉलिवूडचा 'खिलाडी' अभिनेता अक्षय कुमार याचा आज 9 सप्टेंबर रोजी वाढदिवस आहे. अक्षय कुमारच्या वाढदिवसानिमित्त त्याने चाहत्यांना मोठी भेट दिली आहे. वाढदिवसाच्या दिवशी त्याच्या आगामी चित्रपटाची घोषणा करण्यात आली आहे. अक्षय कुमारच्या नवीन भूत बंगला या चित्रपटाचं पोस्टर रिलीज करण्यात आलं आहे. खिलाडी कुमार आता हॉरर कॉमेडी चित्रपटातून प्रेक्षकांच्या भेटीला येणार आहे.
अक्षय कुमारच्या वाढदिवसानिमित्त चाहत्यांना खास भेट
अभिनेता अक्षय कुमार (Akshay Kumar) याचे अलिकडच्या काळात अनेक चित्रपट फ्लॉप ठरले आहेत. अॅक्शन (Action) असो किंवा कॉमेडी (Comedy), त्याच्या कुठल्याच प्रकारच्या चित्रपटांना बॉक्स ऑफिसवर चांगली कामगिरी करता आलेली नाही. आता आगामी चित्रपटासाठी त्याने हॉरर चित्रपटावर डाव साधला आहे. अक्षय कुमारच्या आगामी हॉरर कॉमेडी चित्रपटाचा फर्स्ट लूक आणि चित्रपटाचं नावही जाहीर करण्यात आलं आहे. हा चित्रपट प्रियदर्शन दिग्दर्शित करत असून जवळपास दीड दशकानंतर अक्षय कुमार आणि प्रियदर्शन या चित्रपटाद्वारे एकत्र काम करत आहेत.
भूत बंगला चित्रपटाची पहिली झलक समोर
अक्षय कुमारच्या आगामी चित्रपटाचं नाव 'भूत बांगला' आहे. अभिनेता अक्षय कुमारने इंस्टाग्रामवर एक पोस्ट आणि एक व्हिडीओ शेअर केला आहे. यामध्ये तो हातात दुधाने भरलेली वाटी धरलेला दिसत असून तो वाटीतील दूध जीभेने चाटताना दिसत आहे. त्याच्या खांद्यावर एक काळी मांजर बसलेली दिसत आहे. खिलाडी कुमारचा हा चित्रपट पुढील वर्षी म्हणजेच 2025 मध्ये प्रदर्शित होणार आहे.
अक्षय कुमार आणि दिग्दर्शक प्रियदर्शन यांची जोडी
अक्षय कुमारचे मागील सलग आठ चित्रपट फ्लॉप ठरले. बॉक्स ऑफिसवर अक्षय कुमारचे चित्रपट चांगलेच आपटताना दिसत आहेत. त्यानंतर आता तो हॉरर कॉमेडीकडे वळला आहे. भूत बंगला चित्रपटात तो पुन्हा एकदा दिग्दर्शक प्रियदर्शनसोबत काम करणार आहे. दिग्दर्शक प्रियदर्शनच्या चित्रपटांनी त्याला कॉमेडीचा बादशाह बनवलं होतं, त्यामुळे या चित्रपटामुळे त्याचं करिअर पुन्हा हिट चित्रपटांकडे वळेल, अशी अपेक्षा करण्यात येत आहे. भूत बांगला चित्रपटाची पहिली झलक अक्षय कुमारच्या वाढदिवसानिमित्त चाहत्यांच्या भेटीला आणण्यात आली आहे.