Batwara 1947 Trailer: फाळणीचा थरार पुन्हा मोठ्या पडद्यावर! बंटवारा 1947'चा 3 मिनिटांचा ट्रेलर रिलीज; फाळणीच्या वेदना पाहून सुन्न व्हाल

सनी देओल पुन्हा एकदा दमदार भूमिकेत प्रेक्षकांच्या भेटीला येत असून, ट्रेलरला सोशल मीडियावर चांगला प्रतिसाद मिळत आहे

Batwara 1947 Trailer

Source : ABPLIVE AI

Batwara 1947 Trailer: 1947... भारताच्या इतिहासातील असा काळ, ज्याने लाखो कुटुंबांचं आयुष्य कायमचं बदलून टाकलं. एका रात्रीत घरं, नाती, माणसं आणि स्वप्नं तुटली. याच काळजाला भिडणाऱ्या इतिहासाला मोठ्या पडद्यावर जिवंत करण्याचा प्रयत्न 'बंटवारा 1947' या चित्रपटातून करण्यात आला असून, त्याचा बहुप्रतीक्षित ट्रेलर अखेर प्रदर्शित झाला आहे..

आमिर खान प्रॉडक्शन्सच्या निर्मितीतील आणि राजकुमार संतोषी दिग्दर्शित या चित्रपटात सनी देओल मुख्य भूमिकेत दिसणार आहे. ट्रेलरची सुरुवातच फाळणीच्या रक्तरंजित वास्तवाने होते. जळणारी गावं, जीव वाचवण्यासाठी धावणारी माणसं, एकमेकांपासून कायमची दुरावलेली कुटुंबं आणि डोळ्यांत वेदना घेऊन जगण्याचा संघर्ष करणारे चेहरे... प्रत्येक दृश्य अंगावर काटा आणणारं आहे.सनी देओल पुन्हा एकदा दमदार भूमिकेत प्रेक्षकांच्या भेटीला येत असून, ट्रेलरला सोशल मीडियावर चांगला प्रतिसाद मिळत आहे.

कसा आहे 'बंटवारा 1947'चा ट्रेलर?

'बंटवारा 1947' हा भारतीय सिनेसृष्टीतील महत्त्वाकांक्षी चित्रपटांपैकी एक मानला जात आहे. याआधी प्रदर्शित झालेल्या पोस्टर्स आणि टीझरमधूनच चित्रपटाविषयीची उत्सुकता शिगेला पोहोचली होती. आता प्रदर्शित झालेल्या ट्रेलरमध्ये 1947 मधील भारताच्या फाळणीच्या काळातील सर्वात वेदनादायी वास्तव भावनिक पद्धतीने मांडण्यात आले आहे.

ट्रेलरमध्ये हिंसा, भीती आणि जबरदस्तीच्या स्थलांतरामुळे उद्ध्वस्त झालेल्या एका कुटुंबाची कथा दाखवण्यात आली आहे. एकत्र राहणारी माणसं फाळणीच्या आगीत एकमेकांपासून दूर जातात. मात्र, या सर्व वेदनांनंतरही माणुसकी, आशा आणि जगण्याची जिद्द कशी टिकून राहते, हे चित्रपट अधोरेखित करतो.

स्टारकास्टचीही एकच चर्चा

ट्रेलरमध्ये सनी देओल एका तत्त्वनिष्ठ आणि कोणत्याही परिस्थितीत आपल्या मूल्यांशी तडजोड न करणाऱ्या व्यक्तीच्या भूमिकेत दिसत आहेत. शबाना आझमी एका ज्येष्ठ महिलेच्या भूमिकेत असून, त्यांची समजूतदारपणा, साधेपणा आणि खंबीर विचारसरणी कथेला वेगळी उंची देते.तर प्रीती झिंटा एका अशा महिलेची भूमिका साकारत आहे, जी कठीण परिस्थितीतही आपल्या कुटुंबाला एकत्र ठेवण्यासाठी संघर्ष करते.

CBFC कडून 'A' प्रमाणपत्र

सनी देओल यांनी यापूर्वी सोशल मीडियावर माहिती देताना सांगितले होते की, 'बंटवारा 1947'ला CBFC कडून एकही कट न लावता मंजुरी देण्यात आली आहे. चित्रपटाला 'A' प्रमाणपत्र देण्यात आले आहे.

देशातील प्रत्येक आईला समर्पित केला ट्रेलर

ट्रेलर रिलीज होण्यापूर्वी सनी देओल यांनी त्यांच्या आईसोबतचा फोटो सोशल मीडियावर शेअर करत हा ट्रेलर देशातील प्रत्येक आईला समर्पित केला. त्यांनी पोस्टमध्ये लिहिले, "माझी आईच माझ्यासाठी देव आहे. माझं प्रेम, माझं धैर्य आणि माझी ताकद. 'बंटवारा 1947' हा चित्रपट मी माझ्या आईसह जगातील प्रत्येक आईला समर्पित करतो."