Atul Todankar On Prashant Damle: ब्रेन हॅमरेज, मुलाची दहावी, घराचे EMI .. प्रशांत दामलेंनी न सांगता उचलला अभिनेत्याचा उपचाराचा खर्च
मराठी मनोरंजन विश्वात असे अनेक कलाकार आहेत जे कामाव्यतिरिक्त वैयक्तिक आयुष्यातही एकमेकांना मदत करताना दिसतात.
Atul Todankar on Prashant Damle: मराठी रंगभूमी, मालिका, विनोदी चित्रपटांमधून महाराष्ट्राच्या प्रेक्षकांना खळखळून हसवणारा अभिनेता अतुल तोडणकर (Atul Todankar) गेल्या काही महिन्यांपासून मनोरंजन विश्वापासून जरा दूर आहे. दोन वर्षांपूर्वी अतुलला ब्रेन हॅमरेज असल्याचं निदान झालेलं. त्यानंतर त्याच्या आर्थिक परिस्थिती इतकी खालावली की उपचाराचे पैसे भरणेही त्याला कठीण झालं होतं. अलीकडेच राजश्री मराठीला दिलेल्या एका मुलाखतीत त्यानं त्याचा आजारपणातील आर्थिक संघर्षाविषयी सांगितलं. अतुलच्या उपचाराचा सर्व खर्च प्रशांत दामले (Prashant Damle) यांनी स्वतः उचलल्याचं त्यानं या मुलाखतीत सांगितलं. त्याच्या या मुलाखतीची सध्या मनोरंजनसृष्टीत चर्चा आहे. आता अतुल आजारपणातून पूर्णपणे बरा झालाय. त्याचं 'तरुण तुर्क म्हातारे अर्क ' नावाचं नाटक रंगभूमीवर प्रेक्षकांसमोर आलंय. या निमित्ताने त्यानं त्याच्या आजारपणा विषयी मोकळेपणाने सांगितलं.
मनोरंजन विश्वात अनेकदा असलेली नाती ही फरशी घट्ट नसतात. तात्पुरते, वरवरचे संबंध असतात असं अनेकांकडून ऐकायला मिळतं. पण मराठी मनोरंजन विश्वात असे अनेक कलाकार आहेत जे कामाव्यतिरिक्त वैयक्तिक आयुष्यातही एकमेकांना मदत करताना दिसतात.
काय म्हणाला अतुल तोडणकर ? (Atul Todankar)
अतुल म्हणाला ' आता हे बोललं पाहिजे की नाही माहित नाही. पण आजारपणात माझे आयुर्वेदिक उपचार सुरू होते. साताऱ्याला सुयोग दांडेकर डॉक्टर यांच्याकडे मी उपचार घेत होतो. त्यांना कळलं तेव्हा त्यांनी 'ताबडतोब ये ' असं सांगितलं .पण हे उपचार खर्चिक असल्याचं मी त्यांना सांगू शकलो नाही. हो येईन येईन असं म्हणत राहिलो. तेव्हा मी तो खर्च देऊ शकणार नव्हतो. आजारपणामुळे उत्पन्नाचे सगळे मार्ग बंद झाले होते. कामच नव्हतं त्यामुळे पैसे कुठून येणार! त्यावेळी मुलगा दहावीला होता. घराचे हप्ते वगैरे अशा सगळ्या गोष्टी होत्या. पण त्यांनीही पैशाचा विचार करू नको असं म्हटलेलं. '
'माझा सगळा खर्च प्रशांत दामलेंनी उचलला ' (Atul Todankar on Prashant Damle)
अतुल पुढे म्हणाला ' तिकडे गेल्यानंतर त्यांनी आठ दिवस उपचार केले. त्यामुळे मला खूप फरक पडला. ब्रेन हॅमरेज मधून बरं होऊन आता मी काम करू शकतोय , यात त्यांचा मोठा वाटा आहे. मी नंतर त्यांना विचारलं तुमच्यासाठी काय करू? त्यांनी त्यावर फक्त एक प्रतिक्रिया द्यावी . मी म्हटलं ठीक आहे. पण वर्षभरानंतर त्यांनी मला सांगितलं की तुझ्या आणि माझ्यातला एक दुवा आहे. त्याने या सगळ्या गोष्टी हँडल केल्या. म्हणजेच माझा सगळा खर्च प्रशांत दामले यांनी उचलला होता. " असं अतुल तोडणकर म्हणाला.
'एका लग्नाची पुढची गोष्ट नाटकाच्या 500व्या प्रयोगाला प्रशांत दामले यांनी त्यांच्या भाषणात या नाटकातून मला अतुल तोडणकर सारखा मित्र मिळाला असं म्हटलेलं, त्यावेळी मी अवाक झालो होतो. मी ती भावनाच व्यक्त करू शकत नाही.इतका अनुभवी माणूस आपल्या मैत्रीच्या नात्याचा उच्चार करतो ही खूप मोठी गोष्ट होती. हे पाठबळ माझ्याकडे आहे.इतका मोठा स्टार तुमच्या मागे उभा राहतो हीच तुमची ताकद आहे. " असं त्याने सांगितलं.
महत्त्वाच्या बातम्या
