All Of Us Are Dead 2 : प्रेक्षकांना लवकरच कोरियन वेब सिरीज ‘ऑल ऑफ अस आर डेड’चा (All Of Us Are Dead 2) दुसरा सीझन ओटीटी प्लॅटफॉर्म नेटफ्लिक्सवर (Netflix) पाहायला मिळणार आहे. या वेब सिरीजच्या पहिल्या सीझनला चांगला प्रतिसाद मिळाला होता. त्यानंतर नेटफ्लिक्सने ‘ऑल ऑफ अस आर डेड’चा दुसरा सीझन जाहीर केला आहे. या सिरीजच्या पहिल्या सीझनमध्ये दाखवलेल्या झॉम्बी कथेला प्रेक्षकांनी अक्षरशः डोक्यावर उचलून घेतले होते. आता या सिरीजच्या दुसऱ्या सीझनची घोषणा ऐकून चाहतेही खुश झाले आहेत.



'ऑल ऑफ अस आर डेड'च्या पहिल्या सीझन ही झॉम्बी हल्ल्याची कथा आहे. या सिरीजमध्ये, हायस्कूल हा झॉम्बींचा अड्डा बनतो. शाळेतील विद्यार्थी कठीण परिस्थितीत अडकतात. विद्यार्थ्यांना स्वतःचा जीव तर वाचवावा लागतोच, पण शाळेलाही या संकटातून बाहेर काढावे लागते. ‘ऑल ऑफ अस आर डेड’मध्ये त्यांच्या स्वत:च्या मित्रांसोबतच्या जीवनाच्या लढाईची कहाणी अतिशय मनोरंजक आणि साहसांनी भरलेली आहे. आता याच्या दुसऱ्या पर्वातही अशीच थरारक कथा पाहायला मिळणार आहे.


जुनी कथाच पुढे नेणार की, नवी कथा भेटीला येणार?


‘ऑल ऑफ अस आर डेड’च्या पहिल्या सीझनचा शेवट हा तसा कथा पुढे नेली जाऊ शकेल असाच होता. ही सिरीज पाहिल्यावर अनेकांना वाटलं की, ती कथा तिथेच संपली आहे. मात्र, अद्याप या दुसऱ्या सीझनच्या कथेविषयी कोणतीही माहिती जाहीर करण्यात आलेली नाही. काही चाहत्यांनी असा अंदाज बंघ्ला आहे की, पहिल्या सीझनची कथाच पुढे जाईल. तर, काहींना वाटतेय की, जुन्याच कलाकारांसह एक नवी कथा प्रेक्षकांच्या भेटीला येईल. या सीझनच्या घोषणेच्या निमित्ताने ‘ऑल ऑफ अस आर डेड’च्या कलाकारांनी एक व्हिडीओ देखील शेअर केला आहे.


'ऑल ऑफ अस आर डेड' या कोरियन वेब सिरीजमध्ये ‘स्क्विड गेम’ फेम अभिनेता अभिनेता ली यू-मी मुख्य भूमिकेत दिसला होता. तसेच, युन चॅन यंग, ​​पार्क जी हू, चो यी ह्यून, पार्क सोलोमन आणि यू इन सू देखील महत्त्वपूर्ण भूमिकेत झळकले होते.  


हेही वाचा :