Aai Tuljabhavani Colors Marathi Serial Track: 'आई तुळजाभवानी' मालिकेत व्यसनाला हरण्यासाठी प्रकटणार देवीचं अलौकिक 'व्यसनखंडीनी रूप', PHOTOs
Aai Tuljabhavani Colors Marathi Serial Track: अत्यंत थरारक आणि विस्मयकारक टप्प्यावर आली असून मानवी मनातील व्यसनाधीनतेला हरवण्यासाठी आई तुळजाभवानीच्या अलौकिक 'व्यसनखंडीनी' रूपाचे विराट दर्शन प्रेक्षकांना घडणार आहे.
Aai Tuljabhavani Colors Marathi Serial Track: कलर्स मराठीवरील (Colours Marathi) 'आई तुळजाभवानी' (Aai Tuljabhavani) या लोकप्रिय मालिकेत सध्या अबालवृद्धांना खिळवून ठेवणारा सर्वात मोठा शक्तिरूप दर्शनाचा टप्पा सुरू आहे. निर्जला ते आषाढी एकादशी या अत्यंत पवित्र आणि कर्मशुद्धीच्या काळात मालिकेत 'दिव्य स्वस्तिकाचा निर्णायक महिना' पाहायला मिळत आहे. भुलोकावर भक्तीचा चातुर्मास सुरू होऊ नये म्हणून पाताळदेवी आणि तिचा चेला भुजंगने अकालमृत्यू, भय, चिंता आणि व्यसन या चार विकारांचा वापर करून एक भयानक कारस्थान रचले आहे. यातील अकालमृत्यू, भय, चिंता या संकटांचा निपात केल्यानंतर, आता कथा एका अत्यंत थरारक आणि विस्मयकारक टप्प्यावर आली असून मानवी मनातील व्यसनाधीनतेला हरवण्यासाठी आई तुळजाभवानीच्या अलौकिक 'व्यसनखंडीनी' रूपाचे विराट दर्शन प्रेक्षकांना घडणार आहे.
'दिव्य स्वस्तिकाचा' हा चौथा आठवडा गावकरी भिक्याच्या आयुष्यात आलेल्या व्यसनाच्या भयानक जाळ्यावर आणि त्यातून बाहेर पडण्याच्या संघर्षावर आधारित आहे. भुजंगाने भिक्याला एक मायावी सारीपाट दिला आहे, ज्याच्या नादात भिक्याला जिंकण्याची सवय लागते आणि त्या सवयीचे पुढे गंभीर व्यसनात रूपांतर होते. त्याची छंदीष्ट बायको सुरेखाची स्वप्नं पूर्ण करत असताना, भिक्याला हे कळतच नाही की, प्रत्येक विजयाबरोबर त्याच्या आयुष्यातील काही वर्षं कमी होत आहेत आणि तो झपाट्याने म्हातारा होत चालला आहे.
व्यसनाची नशा आणि शारीरिक रास यामुळे भिक्याचे आयुष्य उद्ध्वस्त होऊ लागते. जेव्हा त्याला यातून बाहेर पडायचे असते, मात्र तो व्यसनाच्या ओढीने बाहेर पडू शकत नाही. अश्यावेळी तुळजाई कुठलाही दैवी चमत्कार न करता त्याला या गर्तेतून बाहेर काढण्याचे ठरवते.
हा प्रवास तितकासा सोपा नाही, कारण पाताळशक्तीने निर्माण केलेल्या या विकारांचा प्रभाव खूप मोठा आहे. अशा वेळी व्यसनाच्या या अथांग गर्तेतून भिक्या स्वतःला कसा सोडवणार? संकटांशी झुंजायचे बळ देणाऱ्या आई तुळजाभवानीचा 'व्यसनखंडीनी' अवतार भिक्याला या संकटातून कसे बाहेर काढणार? ब्रह्मांडातील स्वस्तिकाचा चौथा हात कसा तेजाने उजळणार, त्यानंतर हे दिव्य स्वस्तिक पूर्णपणे उजळण्याचा सोहळा घडणे हे पाहणे कमालीचे ठरेल. व्यसनमुक्ती, भक्ती आणि भावनांचा हा त्रिवेणी संगम प्रेक्षकांना दैवी आध्यात्मिक अनुभूती देणारा ठरेलच बरोबरीने जगण्याची एक मोठी शिकवण देवी देणार आहे. ब्रह्मांडात ताऱ्यांचे निर्माण झालेले 'दिव्य स्वस्तिक' पूर्णपणे प्रकाशमान होण्याचा आणि भुलोक चातुर्मासाच्या पवित्र काळात प्रवेश करण्याचा हा प्रवास पुढे कसा सरकणार, हे पाहणं औत्सुक्याचं ठरणार आहे.
महत्त्वाच्या बातम्या
