UP Result : उत्तर प्रदेशात योगी मॅजिक, सपाची तोकडी फाईट, काँग्रेस, बसपाचा सूपडा साफ

UP Election Result 2022 : योगींच्या मॅजिकपुढे विरोधकांची अवस्था दयनीय झाली आहे. राष्ट्रीय पक्ष असलेल्या काँग्रेस आणि बसपाचा सूपडा साप झाला आहे. या दोन्ही पक्षांना दुहेरी संख्याही गाठता आली नाही.

yogi_adiyanath

UP Election Result 2022 : उत्तर प्रदेशसह पाच राज्यातील विधानसभा निवडणुकीचा निकाल जवळपास निश्चित झाला आहे. पंजाब वगळता इतर सर्व राज्यात भाजपने आघाडी घेतली आहे. उत्तर प्रदेशमध्ये मुख्यमंत्री योगी आदित्यानाथ यांचा जादू पुन्हा चालली आहे. योगींच्या मॅजिकपुढे विरोधकांची अवस्था दयनीय झाली आहे. राष्ट्रीय पक्ष असलेल्या काँग्रेस आणि बसपाचा सूपडा साप झाला आहे. या दोन्ही पक्षांना दुहेरी संख्याही गाठता आली नाही. अखिलेश यादव यांच्या समाजवादी पार्टीने तोकडी फाईट दिली, पण भाजपला सत्तास्थापणेपासून राखू शकले नाहीत. 

सहा वाजेपर्यंत हाती आलेल्या आकडेवारीनुसार, उत्तर प्रदेशमध्ये भाजपने 269 जागांवर दावा ठोकला आहे. 403 विधानसभा जागा असणाऱ्या उत्तर प्रदेशमध्ये सत्ता स्थापन करण्यासाठी 202 जागांची गरज असते. भाजपने ही मॅजिक फिगर पार केली आहे. उत्तर प्रदेशमध्ये योगींची जादू पुन्हा चालली आहे. योगी आदित्यनाथ दुसऱ्यांदा मुख्यमंत्रिपदाची शपथ घेणार आहे. अखिलेश यादव यांच्या समाजवादी पार्टीला 129 जागांवर समाधान मानावे लागले आहे. तर काँग्रेस पक्षाला फक्त दोन जागा जिंकता आल्या आहेत. तर बसपा फक्त एका जागेवर जिंकली आहे. तर जागांवर अपक्ष उमेदवारांनी बाजी मारली आहे.

यंदाच्या निवडणुकीत भाजपला एकहाती सत्ता मिळाली असली तरी 2017 च्या तुलनेत फटका बसला आहे. 2017 मध्ये योगी आदित्यनाथ यांच्या नेतृत्वात झालेल्या विधानसभा निवडणुकीत भाजपने 312 जांगावर विजय मिळवला होता. म्हणजेच यंदाच्या निवडणुकीत भाजपला 43 जागांचा तोटा झाला आहे. 2024 मध्ये होणाऱ्या लोकसभा निवडणुकीच्या पार्श्वभूमीवर ही विधानसभा निवडणूक महत्वाची मानली जात आहे. केंद्रातील सत्तेचा मार्ग उत्तर प्रदेशमधून जातो, असे म्हटले जाते. त्यामुळे भाजपने उत्तर प्रदेश जिंकून 2024 च्या लोकसभा निवडणुकीपूर्वी आपले मनोधेर्य नक्कीचे वाढवले असेल. 

योगींचा लाखांहून अधिक मतांनी विजय -
उत्तर प्रदेशचे मुख्यमंत्री आदित्यनाथ यांनी गोरखपूर विधानसभा मतदारसंघातून मोठा विजय मिळवलाय. त्यांनी तब्बल एक लाखांहून अधिक मतांनी विजय मिळवला आहे. याच मतदार संघातून लढणाऱ्या भीम आर्मीचे चंद्रशेखर यांचं डिपॉझिट जप्त झालाय. त्यांना केवळ 5 हजार 409 मत मिळाली आहेत.

भाजप कार्यकर्त्यांचा जल्लोष - 
उत्तर प्रदेश विधानसभा निवडणुकीच्या निकाल पाहता भाजपमध्ये कार्यकर्त्यांमध्ये उत्साहाचे वातावरण पाहायला मिळत आहे. पक्षाच्या दणदणीत विजयानं उत्साहात असलेले कार्यकर्ते होळीपूर्वीच रंग आणि गुलालाची होळी खेळत आहेत. राज्यातील सर्व जिल्ह्यांतील भाजप कार्यालयाबाहेर आणि आजूबाजूला कार्यकर्ते जल्लोष करताना दिसत आहेत. 

उत्तर प्रदेशमध्ये काँग्रेसची दयनीय अवस्था - 
उत्तर प्रदेश विधानसभा निवडणूक काँग्रेस पक्षाने प्रियंका गांधी यांच्या नेतृत्वात लढली होती. काँग्रेसने सर्व 403 जागांवर आपले उमेदवार दिले होते. प्रचारादरम्यान प्रियंका गांधी यांनी 'लड़की हूं,लड़ सकती हूं' या घोषणासह महिलांना 40 टक्के जागा दिल्या होत्या. पण काँग्रेसला 2017 विधानसभा निवडणुकीपेक्षा दारुण पराभव झाला आहे. काँग्रेस पक्षाला 403 जागांपैकी फक्त दोन जागांवर समाधान मानावे लागले आहे. या निकालावरुन उत्तर प्रदेशमधील जनतेने प्रियंका गांधी यांचे नेतृत्व नाकारल्याचे स्पष्ट दिसतेय. उत्तर प्रदेश विधानसभा निवडणुकीद्वारे प्रियंका गांधी यांनी राष्ट्रीय राजकारणात प्रवेश केला. पण प्रियंका गांधी यांची एन्ट्री सुपरफ्लॉप ठरल्याचे दिसतंय. 

यूपीत बसपाच्या अस्तित्वाचा प्रश्न निर्माण झाला?
उत्तर प्रदेश निवडणुकीत बहुजन समाज पक्षाचा अस्तित्वाचा प्रश्न निर्माण झाला आहे. 2007 मध्ये एक हाती सत्ता मिळवणारा बसपा पक्ष आता यूपीत फक्त 1 जागेवर सीमित झाला आहे. 2017 च्या विधानसभा निवडणुकीत बसपाला 19 जागांवर यश मिळालं होतं. मात्र 2022 ची निवडणूक येता-येता पक्षात फक्त 3 आमदारच शिल्लक राहिले. यामधील काही आमदारांनी बसपाची साथ सोडत भाजप आणि समाजवादी पक्षात प्रवेश केला. तर काहींना स्वतः बसपा पक्ष प्रमुख मायावती यांनी बाहेरचा रस्ता दाखवला आहे. बसला आपला 2017 चा आकडाही पुन्हा गाठता आला नाही आहे.  

आणखी वाचा :