खोटी दाढी-मिशी लावून आम्हाला संभाजी-शिवाजी सांगायचं काम करु नये, शिवसेनेची अमोल कोल्हेंवर टीका

शिरुर लोकसभेसाठी राष्ट्रवादी काँग्रेसने अमोल कोल्हेंची उमेदवारी जाहीर करताच, अवघ्या काही तासात अशा आरोपांच्या फैरी झडू लागल्या आहेत. एकूण आरोप पाहता शिरुर लोकसभेची निवडणूक 'स्वराज्यरक्षक संभाजी' मालिका आणि जातीच्या राजकारणात अडकून राहणारी दिसत आहे.

पिंपरी-चिंचवड : खोटी दाढी-मिशी लावून आम्हाला शिवाजी महाराज, संभाजी महाराज सांगायचं काम करू नये, असा घणाघात मनसेतून शिवसेनेत दाखल झालेले आमदार शरद सोनवणेंनी अभिनेते अमोल कोल्हेंवर केला. शिवसेनेला जय महाराष्ट्र केलेल्या अमोल कोल्हेंना राष्ट्रवादीकडून शिरुरमधील लोकसभेची उमेदवारी मिळाली आहे.

शिरुरमधील शिवसेनेचे संभाव्य उमेदवार शिवाजीराव आढळराव पाटलांनीही, मी निधड्या छातीचा मराठा, मी शिवरायांचा पाईक, असं म्हणत मराठा कार्ड बाहेर काढलं.

शिरुर लोकसभेसाठी राष्ट्रवादी काँग्रेसने अमोल कोल्हेंची उमेदवारी जाहीर करताच, अवघ्या काही तासात अशा आरोपांच्या फैरी झडू लागल्या आहेत. एकूण आरोप पाहता शिरुर लोकसभेची निवडणूक 'स्वराज्यरक्षक संभाजी' मालिका आणि जातीच्या राजकारणात अडकून राहणार असल्याचं दिसत आहे.

अमोल कोल्हे यांनी राष्ट्रवादी काँग्रेसमध्ये प्रवेश केल्यानंतर पहिल्याच दिवशी संभाजी महाराजांच्या मालिकेवर राजकारण न करण्याचं आवाहन केलं होतं. मात्र विरोधक त्यांना याच मुद्द्यावर घेरणार हे आता स्पष्ट झालं आहे. कोल्हेंनी आधी शिवाजी महाराज आणि आता संभाजी महाराजांच्या भूमिकेतून घराघरात स्थान मिळवलं आहे.

मात्र अमोल कोल्हेंचं लोकांच्या मनातील स्थान डोईजड ठरताना दिसत असल्याचं पाहून प्रतिस्पर्धी आढळराव यांनी देखील त्याच विषयात हात घातला. म्हणूनच शिवजन्मभूमी शिवनेरी गड ते शंभूराजांच्या स्मृतिस्थळी म्हणजेच वढू तुळापूर अशी त्यांनी रॅली काढली. दोन्ही महाराजांचा हा ठेवा शिरूर लोकसभा मतदारसंघातच येतो.

या रॅलीनंतर झालेल्या सभेत बोलताना म्हटलं की, आढळरावांनी मी निधड्या छातीचा मराठा, मी शिवरायांचा पाईक आहे, तेव्हा मला कुणी आव्हान देऊ नये. तर खोटी दाढी-मिशा लाऊन तुम्ही आम्हाला संभाजी-शिवाजी सांगायचं काम करु नका, असा टोला शरद सोनावणे यांनी लगावला.

त्यामुळे शरद सोनावणे आणि आढळराव पाटील यांच्या टीकेनंतर अमोल कोल्हे यावर काय प्रतिक्रिया देणार हे येत्या काळात स्पष्ट होईल. मात्र आरोप प्रत्यारोप करताना शिवाजी महाराज आणि संभाजी महाराज यांचा अपप्रचार होणार नाही, याची काळजी सर्वांनी घेणं गरजेचं आहे.