छगन भुजबळांच्या शिवसेना प्रवेशला शिवसैनिकांचा विरोध, मुंबईत बॅनरबाजी

विक्रोळी येथील शिवसैनिक रवींद्र तिवारी यांनी शिवसेना भवन समोर ,मातोश्री समोर तसेच मुंबईच्या सर्वच प्रमुख चौकात भुजबळांच्या विरोधाचे बॅनर लावले आहेत.

मुंबई : राष्ट्रवादीचे नेते आणि माजी मंत्री सचिन अहिर यांच्या शिवसेना प्रवेशानंतर राष्ट्रवादीचे ज्येष्ठ नेते छगन भुजबळ देखील शिवसेनेत प्रवेश करणार असल्याच्या चर्चा होत्या. मात्र भुजबळांच्या शिवसेना प्रवेशाला शिवसैनिकांनी विरोध दर्शवला आहे. शिवसेना प्रवेश या अफवा असल्याचं छगन भुजबळांनी आधीच स्पष्ट केलं.

सचिन अहिरांनंतर छगन भुजबळही शिवसेनेत येणार असल्याची बातम्या सोशल मीडियावर व्हायरल झाल्या होत्या. या आधारावरच शिवसैनिकांनी भुजबळांच्या पक्षप्रवेशाला विरोध करण्यास सुरुवात केली आहे. विक्रोळी येथील शिवसैनिक रवींद्र तिवारी यांनी शिवसेना भवन समोर, मातोश्री समोर तसेच मुंबईच्या सर्वच प्रमुख चौकात भुजबळांच्या विरोधाचे बॅनर लावले आहेत.

बॅनरवर छगन भुजबळ यांचे एक कार्टून असून त्यांना लखोबा लोखंडे संबोधले आहे. साहेबांना दिलेला त्रास महाराष्ट्रातील जनता विसरु शकत नाही, आपण आहे तिथेच राहा, असा संदेश या बॅनरवर देण्यात आला आहे. त्यामुळे आता ऐन निवडणुकीच्या तोंडावर शिवसेनेत होणाऱ्या इनकमिंगवर शिवसैनिकांची नाराजी दिसून येत आहे.

छगन भुजबळांकडून शिवसेना प्रवेशाचं खंडन

शिवसेना प्रवेशाबाबतच्या चर्चांचं छगन भुजबळांनी खंडन केलं आहे. मी शिवसेनेत प्रवेश करणार आहे, या बातम्या खोट्या आहेत. मी शिवसेनेत प्रवेश करण्याच्या बातम्यांमध्ये तथ्य नाही. सचिन अहिर आणि माझा मुळचा मतदारसंघ भाखयळा जवळ असल्याने या चर्चा सुरु झाल्या असाव्या, असा अंदाज छगन भुजबळ यांनी व्यक्त केला.

संबंधित बातम्या

• वैभव पिचड आणि मुख्यमंत्र्यांची भेट, राष्ट्रवादीचा आणखी एक आमदार भाजपच्या गळाला?
• राष्ट्रवादीचे नेते सचिन अहिर यांचा शिवसेनेत प्रवेश
• राष्ट्रवादी विलीनीकरण निव्वळ अफवा, मुद्दाम ही बातमी पसरवण्यात आली : शरद पवार
• काँग्रेसबरोबर राष्ट्रवादी काँग्रेसलाही राज्यात मोठी खिंडार पडण्याची चिन्हं, अनेक आमदार भाजप-शिवसेनेच्या संपर्कात
• राष्ट्रवादी काँग्रेस राष्ट्रीय पक्षाचा दर्जा गमावण्याची चिन्हं, निवडणूक आयोगाची नोटीस