Raosaheb Danve : नाव ठरलंय, महाराष्ट्राचा नेता कोण असावा, याची स्क्रिप्ट तयार; रावसाहेब दानवेंच्या वक्तव्याने भुवया उंचावल्या

Raosaheb Danve : भाजपची काम करण्याची एक पद्धत आहे. महाराष्ट्र राज्याचा नेता कोण असावा, याची स्क्रिप्ट तयार असल्याचे वक्तव्य रावसाहेब दानवे यांनी केले आहे.

Raosaheb Danve

Source : ABP Majha

मुंबई : महाराष्ट्र विधानसभा निवडणुकीत (Maharashtra Vidhan Sabha Election 2024) महायुतीला (Mahayuti) मोठे यश मिळाले तर महाविकास आघाडीचा (Mahavikas Aghadi) लाजीरवाणा पराभव झाला. यानंतर महाराष्ट्राचे नवे मुख्यमंत्री (Maharashtra CM) कोण होणार? याची संपूर्ण राज्याला उत्सुकता लागली आहे. देवेंद्र फडणवीस (Devendra Fadnavis) हे मुख्यमंत्री होतील, असे बोलले जात असले तरी अद्याप भाजपकडून मुख्यमंत्रीपदाचे अधिकृत नाव घोषित करण्यात आलेले नाही. आता भाजप नेते रावसाहेब दानवे (Raosaheb Danve) यांनी केलेल्या वक्तव्याने सर्वांच्याच भुवया उंचावल्या आहेत. 

नेमकं काय म्हणाले रावसाहेब दानवे?

रावसाहेब दानवे म्हणाले की, भाजपची काम करण्याची पद्धत आहे. त्याप्रमाणे काम सुरू आहे. पक्षाने नवनिर्वाचित आमदारांची बैठक बोलवून नेता निवडला जाईल. महाराष्ट्र राज्याचा नेता कोण असावा, याची स्क्रिप्ट तयार आहे. महाराष्ट्राच्या निवडणुकांचा निकाल विचार करून स्क्रिप्ट लिहून ठेवली आहे. आता त्यावर सही होणार आणि मग नाव बाहेर येणार अर्थात नाव ठरवलेलं आहे. राज्याला माहिती आहे की, मुख्यमंत्री कोण होणार आहे. जनता संभ्रमात नाही. जनता तो पर्यंत बोलत नाही, तोपर्यंत आमचे वरिष्ठ नेते बोलत नाही, असे त्यांनी म्हटले आहे. 

संजय राऊतांनाच मांत्रिकाची गरज

एकनाथ शिंदे यांना डॉक्टरांची गरज आहे की मांत्रिकाची? त्यांना बरं करण्यासाठी मांत्रिक अमित शहा पाठवत आहेत की नरेंद्र मोदी पाठवत आहेत, अशी टीका शिवसेना ठाकरे गटाचे खासदार संजय राऊत यांनी केली. यावर रावसाहेब दानवे म्हणाले की, संजय राऊतांनाच मांत्रिकाची गरज आहे. एखाद्या ठिकाणी मेंटल हॉस्पिटल असेल तर त्यांना नेले पाहिजे. तांत्रिक आणि मांत्रिक यावर राजकारण चालत नसतं.  त्यांचा विश्वास तांत्रिकावर आहे आणि माझा लोकांवर आहे, अशी टीका त्यांनी संजय राऊत यांच्यावर केली. 

शिंदे गावी गेल्यावर सरकार चालणार नाही का?

एकनाथ शिंदे अचानक गावी निघून गेल्यावरून देखील संजय राऊत यांनी टीका केली. यावर  उद्धव ठाकरे ऑपरेशन करायला गेले, तेव्हा सरकार चाललं, मग शिंदे गावी गेल्यावर सरकार चालणार नाही का? असा सवाल रावसाहेब दानवे यांनी उपस्थित केला. काळजीवाहू मुख्यमंत्र्यांचे अधिकार काय आहे हे मुख्यमंत्र्यांना माहीत आहे, असेही त्यांनी म्हटले. 

राऊतांना रुग्णालयात दाखल करायला हवे

डी. वाय. चंद्रचूड हे घटनाबाह्य पद्धतीने काम करत आहेत, असा आरोप संजय राऊत यांनी केला. याबाबत विचारले असता रावसाहेब दानवे म्हणाले की, त्यांनी पीएम, सरकार, निवडणूक आयोग, हाय कोर्टावर आरोप केले. हे स्वतः आरोपी आहेत आणि आरोप करत आहे. त्यांना दुसरे काय येत नाही. त्यांना रुग्णालयात दाखल करायला हवे. ईडीच्या कारवाईमुळे स्वतः संजय राऊत जेलमध्ये गेले हे स्वतः आरोपी असून लोकांवर आरोप करत आहेत, असा टोला त्यांनी यावेळी लगावला.

आणखी वाचा