पालघर नगरपरिषद निवडणुकीत महायुतीला बहुमत, नगराध्यक्षपद राष्ट्रवादीकडे

पालघर नगरपरिषदेवर शिवसेना-भाजप-रिपाइं युतीचा झेंडा फडकला, मात्र नगराध्यक्षपदी राष्ट्रवादीच्या उज्ज्वला काळे विराजमान होणार आहेत.

पालघर : पालघर नगरपरिषद निवडणुकीत शिवसेना-भाजप युतीला बहुमत मिळालं, मात्र नगराध्यक्षपदी राष्ट्रवादीचा उमेदवार विराजमान होणार आहे. थेट जनतेतून राष्ट्रवादीच्या उज्ज्वला काळे नगराध्यक्ष म्हणून निवडून आल्या. पालघर नगरपरिषदेच्या 14 प्रभागांमधील 28 जागांचे निकाल आज जाहीर करण्यात आले. भाजप-शिवसेना-रिपाइं युतीने बहुमत मिळवत 21 जागा जिंकल्या. राष्ट्रवादी कॉंग्रेस महाआघाडीला 2, तर अपक्षांना 5 जागा जिंकता आल्या. नगराध्यक्षपदासाठी शिवसेनेतर्फे राष्ट्रवादीतून आलेल्या श्वेता मकरंद पाटील, राष्ट्रवादीच्या उज्ज्वला केदार काळे आणि शिवसेनेतून बंडखोरी केलेल्या अपक्ष उमेदवार अंजली पाटील रिंगणात होत्या. राष्ट्रवादी-काँग्रेस महाआघाडीच्या उज्ज्वला काळे यांनी 1069 मतांनी विजय मिळवला. महायुती 21 महाआघाडी 2 अपक्ष 5 पालघर नगरपरिषदेच्या 14 प्रभागांमधील 28 जागांसह एका नगराध्यक्षपदासाठी काल मतदान झालं. दिवसभरात अंदाजे 67 टक्के मतदान झाल्याचं जिल्हा माहिती कार्यालयाकडून सांगण्यात आलं. पालघर जिल्ह्याची निर्मिती झाल्यानंतर पहिल्यांदाच पालघर नगरपरिषदेची निवडणूक असल्याने सर्वच राजकीय पक्ष पूर्ण ताकदीनिशी या निवडणुकीत उतरले होते. शिवसेना-भाजप-रिपाइं महायुती, काँग्रेस-राष्ट्रवादी बहुजन विकास आघाडी आणि अपक्ष असा सामना रंगला. पक्षीय बलाबल शिवसेना 14 भाजप 7 राष्ट्रवादी 2 अपक्ष 5 विजयी उमेदवार यादी 90 उमेदवार निवडणुकीच्या रिंगणात उतरले होते. त्यापैकी 30 उमेदवारांनी अपक्ष म्हणून निवडणूक लढवली असून त्यापैकी 22 जण बंडखोर उमेदवार होते. पालघर नगरपरिषदेवर याआधी शिवसेनेची सत्ता होती, मात्र आताच्या निवडणुकीत राष्ट्रवादीकडून आयात उमेदवाराला नगराध्यक्षपदाच्या उमेदवारीची संधी दिल्याने शिवसैनिक नाराज झाले आणि त्यांनी बंडखोर म्हणून अपक्ष उभं राहण्याचा निर्णय घेतला होता.