सत्ता आणि पैशासाठी दोन्ही पक्ष एकत्र, नारायण राणेंचा शिवसेना-भाजपवर घणाघात

शिवसेना-भाजपने साडेचार वर्षात काहीच विकासकामे केली नाहीत. त्यामुळे लोकांचा लक्ष दुसरीकडे वळवण्यासाठी दोन्ही पक्ष एकमेकांशी भांड-भांडले.

रत्नागिरी : भाजप अध्यक्ष अमित शाह यांना अफजलखानाची उपमा देणारे शिवसेना पक्षप्रमुख उद्धव ठाकरे शाह यांच्या लोकसभा उमेदवारी अर्ज भरण्यासाठी गांधीनगरला गेले होते. उद्धव ठाकरेंच्या या भूमिकेवर बोलताना नारायण राणेंनी हा त्यांचा दुतोंडीपणा असल्याचं म्हटलं आहे.

शिवसेना-भाजपने साडेचार वर्षात काहीच विकासकामे केली नाहीत. त्यामुळे लोकांचा लक्ष दुसरीकडे वळवण्यासाठी दोन्ही पक्ष एकमेकांशी भांड-भांडले. मात्र निवडणूक जवळ येताच एकत्र आले. हा सत्तेसाठीचा स्वार्थीपण असल्याची टीका नारायण राणेंनी केली.

दोन्ही पक्षांनी सातत्यानं एकमेकांवर आरोप केले. उद्धव ठाकरेंनी अमित शाहांना अफजलखान म्हणून संबोधलं आणि काल त्यांच्यासाठी गांधीनगरला गेले. हा सगळा खटाटोप सत्तेसाठी आहे, असं नारायण राणे यांनी म्हटलं.

तसेच नाणार रिफायनरी प्रकल्प कोकणात कुठेही आणायचा प्रयत्न झाला तर आमचा विरोधच असेल असं पुन्हा एकदा नारायण राणेनी स्पष्ट केलं. महाराष्ट्र स्वाभिमान पक्षाचे उमेदवार निलेश राणे उद्या आपला उमेदवारी अर्ज दाखल करणार असल्याची माहितीही नारायण राणेंनी यावेळी दिली.