मनसे विधानसभा लढवणार, राज ठाकरेंची घोषणा; पहिला उमेदवारही जाहीर
मुंबईतल्या वांद्र्यातील एमआयजी क्लब येथे मनसेचा मेळावा आयोजित करण्यात आला होता. यावेळी राज ठाकरेंनी मनसे विधानसभा निवडणूक लढवणार असल्याचं जाहीर केलं.
मुंबई : विधानसभा निवडणुकीच्या तारखा जाहीर होऊन, उमेदवारी अर्ज भरण्यासही सुरुवात झाली. सर्वच पक्षांची लगबग सुरु झाली आहे, तर एक पाऊल पुढे जात काँग्रेस-राष्ट्रवादीने आपले काही उमेदवारही जाहीर केलेत. राज ठाकरेंची मनसे निवडणूक लढवणार की नाही? याबाबत काहीही स्पष्ट होत नव्हतं. मात्र राज ठाकरे यांनी विधानसभा निवडणूक लढवणार असल्याचं आज स्पष्ट केलं आणि हळूहळू सगळं सागंणार असंही सांगितलं.
पहिली प्रचारसभा 5 ऑक्टोबरला
मुंबईतल्या वांद्र्यातील एमआयजी क्लब येथे मनसेचा मेळावा आयोजित करण्यात आला होता. या कार्यक्रमात राज ठाकरेंनी मनसे विधानसभा निवडणूक लढवणार असल्याचं जाहीर केलं. तसेच येत्या 5 ऑक्टोबरला पहिली प्रचारसभा घेणार असल्याचंही त्यांनी जाहीर केलं. मात्र ही प्रचारसभा कुठे असणार याची कोणतीही माहिती राज ठाकरेंनी दिली नाही. मनसे विधानसभेच्या किती जागा लढवणार याचीही काही माहिती राज ठाकरेंनी देणं टाळलं. 5 तारखेला तुमच्या सगळ्या प्रश्नांची उत्तरे मिळतील, असं राज ठाकरेंनी सांगितलं.
मनसेचे दोन उमेदवार जाहीर
मंत्रालयात आत्महत्या करणारे शेतकरी धर्मा पाटील यांचे चिरंजीव नरेंद्र पाटील यांनी आज मनसेमध्ये प्रवेश केला. नरेंद्र पाटील मनसेकडून निवडणूक लढणार असल्याचं राज ठाकरेंनी जाहीर केलं. याशिवाय नाशिकमधील शिवसेना नगरसेवक दिलीप दातार हे सुद्धा मनसेत दाखल झाले असून ते देखील निवडणूक लढवणार असल्याचं राज ठाकरेंनी जाहीर केलं.
मनसे 150 जागांवर स्वबळावर लढणार : अभिजीत पानसे
महाराष्ट्र नवनिर्माण सेना 150 जागांवर स्वबळावर विधानसभा निवडणूक लढणार असल्याचं मनसे नेते अभिजीत पानसे यांनी आधीच सांगितलं होतं. मात्र राज ठाकरेंनी किती जागा लढणार हे अद्याप स्पष्ट केलेलं नाही. आजच्या मेळाव्याला मनसे नेते, सरचिटणीस आणि निवडणुकीसाठी इच्छुक असलेले उमेदवार सहभागी झाले होते.
संबंधित बातम्या
महत्त्वाच्या बातम्या
