राज ठाकरेंच्या मुंबईतील सभेसाठी शिवसेनेकडून आडकाठी करण्याचे प्रयत्न?

मनसे अध्यक्ष राज ठाकरे यांना मुंबईत सभा घेण्यास शिवसेनेकडून आठकाठी करण्याचा प्रयत्न सुरु असल्याची माहिती सूत्रांनी दिली आहे. 24 तारखेला राज ठाकरेंची मुंबईत सभा होणार आहे.

मुंबई : मनसे अध्यक्ष राज ठाकरे यांना मुंबईत सभा घेण्यास शिवसेनेकडून आठकाठी करण्याचा प्रयत्न सुरु असल्याची माहिती सूत्रांनी दिली आहे. 24 तारखेला राज ठाकरेंची मुंबईत सभा होणार आहे. मात्र अजूनही या सभेला परवानगी मिळालेली नाही. निवडणुकीच्या काळात सभेच्या परवानगीसाठी असलेली 'एक खिडकी यंत्रणा' आणि मुंबई महानगरपालिका यांच्याकडून परवानगीसाठी टोलवाटोलवी केली जात असल्याचा आरोप मनसेकडून करण्यात येत आहे. '18 तारखेला राज ठाकरेंच्या सभेच्या परवानगीसाठी प्रयत्न केला असता मनसेचा कोणताही उमेदवार निवडणुकीला उभा नसल्याने त्यांनी महानगरपालिकेकडून परवानगी घ्यावी असं निवडणूक अधिकाऱ्यांकडून सांगण्यात आलं. तर महानगरपालिकेच्या अधिकाऱ्यांनी आम्ही परवानगी देऊ शकत नाही असं सांगून परत पाठवलं', अशी माहिती मनसे नेते संजय नाईक यांनी दिली आहे. मुंबईतील शिवडी परिसरात राज ठाकरेंच्या सभेसाठी मनसेचा प्रयत्न सुरु असल्याची माहिती मिळताच शिवसेनेकडून 18 तारखेला अर्ज करुन शिवडी परिसरातील चार मैदानं आरक्षित करण्यात आली, असा आरोपही मनसेकडून करण्यात आला आहे. तसेच परवानही मिळाली नाही तरी सुद्धा मनसेची सभा होणारच अशी भूमिका मनसेकडून घेण्यात येत आहे. लोकसभा निवडणुकीसाठी राज ठाकरे यांनी आतापर्यंत नांदेड, सोलापूर, इचलकरंजी, सातारा, पुणे आणि महाड येथे सभा घेतल्या आहेत. राज्यातील शेवटच्या टप्प्याचं मतदान 29 एप्रिल रोजी होत आहे. त्यापुर्वी आणखी तीन ते चार सभा राज ठाकरे घेण्याची शक्यता आहे.