Maharashtra Vidhansabha election 2024: AB फॉर्म म्हणजे काय रे भाऊ? निवडणुकीत उमेदवारीसाठी कसला फॉर्म भरतायत उमेदवार?

केंद्रीय निवडणूक आयोगाच्या नियमांनुसार विधानसभा किंवा लोकसभेत एखाद्या उमेदवाराला उमेदवारी अर्ज करायचा असेल तर...

AB form

Source : ABPLIVE AI

Maharashtra Assembly Election 2024: विधानसभा निवडणुकीचं बिगुल वाजल्यानंतर राज्यात राजकीय रणधुमाळीला सुरुवात झाली आहे. महाराष्ट्रात 20 नोव्हेंबरला मतदान होणार असून 23 तारखेला मतमोजणी होणार आहे. दरम्यान आता उमेदवारी अर्ज भरण्याच्या प्रक्रियेला वेग आला आहे. राज्यात बहुतांश पक्षांनी आपल्या उमेदवारी याद्या जनतेसमोर ठेवल्या आहेत. सध्या एखाद्या उमेदवाराने AB फॉर्म भरला असे तुमच्या अनेकवेळा कानावर आले असेल. येणाऱ्या वृत्तांमध्येही AB फॉर्म भरल्याची वृत्त येत आहेत. पण हा AB फॉर्म आहे तरी काय? जाणून घेऊया..

A, B  फॉर्म म्हणजे काय?

केंद्रीय निवडणूक आयोगाच्या नियमांनुसार विधानसभा किंवा लोकसभेत एखाद्या उमेदवाराला उमेदवारी अर्ज करायचा असेल तर त्याची खासगी माहिती आणि तो कोणत्या पक्षाकडून उमेदवारी अर्ज दाखल करणार आहे याची माहिती निवडणूक आयोगाला द्यावी लागते. यासाठी त्याला दोन स्वतंत्र फॉर्म भरावे लागतात. यातील पहिला फॉर्म हा A आणि दुसऱ्या फॉर्मला B असे संबोधले जाते. याला एकत्रित AB फॉर्म संबोधले जाते. AB फॉर्म भरणाऱ्या उमेदवाराला त्या पक्षाचा अधिकृत उमेदवार समजले जाते. त्यामुळं हा फॉर्म भरणं महत्वाचं समजलं जातं.

पक्षाचं अधिकृत चिन्ह मिळण्यासाठीचा अधिकृत अर्ज

एबी फॉर्म भरला म्हणजे तो उमेदवार पक्षाचा अधिकृत उमेदवार असल्याचे   शिक्कामोर्तब होते.  पक्षाचे अधिकृत चिन्ह उमेदवारीमागे लागण्यासाठी उमेदवार AB फॉर्म भरतात. या फॉर्मवर पक्षाने तिकिट वाटपासाठी अधिकृत नेमणूक केलेल्या व्यक्तीची स्वाक्षरी असते. हा फॉर्म भरणे म्हणजे त्या राजकीय पक्षाने फॉर्म भरणाऱ्या उमेदवारास त्यांच्या पक्षातर्फे निवडणूक लढवण्याचे तिकिट दिले आहे असा होतो. या फॉर्ममध्ये काही प्रतिज्ञापत्रकंही असतात. 

फॉर्म ए मध्ये काय असते? 

निवडणूक आयोगाच्या अधिकाऱ्याला मान्यताप्राप्त व नोंदणीकृत राजकीय पक्षतर्फे निवडणूक लढवणाऱ्या उमेदवाराचे नाव सांगणारा हा फॉर्म आहे. या फॉर्मवर पक्षाचा अधिकृत शिक्का आणि तिकिटवाटपासाठी पक्षाने नेमलेल्या प्रमुख व्यक्तीची सही असते. यात पक्षातील अर्ज भरणाऱ्या व्यक्तीचे नाव, पक्षातील पद, पक्षाचे चिन्ह या गोष्टी नमूद असतात. 

बी फॉर्मवर काय असते?

फॉर्म बी मध्ये राजकीय पक्षाकडून जाहीर झालेल्या उमेदवाराचे नाव व इतर माहिती असते. बी फॉर्मवर पक्षाने सुचवलेल्या आणखी एका उमेदवाराचेही नाव असते. काही कारणास्तव पहिल्या उमेदवाराचा अर्ज फेटाळला गेला तर 'बॅकअप' म्हणून या दुसऱ्या उमेदवाराला निवडणूक आयोग अधिकृत उमेदवार म्हणून निवडू शकतो.