Maharashtra Vidhan Sabha Election 2024: राज्यात 20 नोव्हेंबर रोजी विधानसभेसाठी मतदान होणार आहे. तर 23 नोव्हेंबर रोजी मतमोजणी पार पडणार आहे. विधानसभा निवडणुकीसाठी राज्यातील सर्वंच पक्षांनी तयारी केली आहे. तर भाजप, काँग्रेस, शिवसेना शिंदे गट, शिवसेना ठाकरे गट, राष्ट्रवादी काँग्रेस शरद पवार गट आणि राष्ट्रवादी काँग्रेस अजित पवार गटाने यादी जाहीर केली आहे. रायगडमधील पेण विधानसभा मतदारसंघात (Pen Assembly Constituency) देखील शिवसेना ठाकरे गट आणि शेतकरी कामगार पक्ष यांच्यात खरी लढत होणार आहे.
2019 मध्ये काय घडलेलं?
पेण मतदारसंघ 2019 मध्ये हा मतदारसंघ भारतीय जनता पक्षाने जिंकला होता. पेण महाराष्ट्र राज्यातील रायगड जिल्ह्यांतर्गत येतो. 2019 मध्ये, भारतीय जनता पक्षाचे रवीशेठ पाटील यांनी 24051 मतांच्या फरकाने भारतीय शेतकरी आणि कामगार पक्षाचे धैर्यशील मोहन पाटील यांचा पराभव करून जागा जिंकली.
रायगड जिल्ह्यात महायुतीचं वर्चस्व-
नुकत्याच झालेल्या लोकसभा निवडणुकीत अजित पवार गटाच्या सुनील तटकरे यांचा विजय झाला. तर ठाकरे गटाचे नितीन गिते यांना पराभवाचा सामना करावा लागला. रायगड जिल्ह्यातील 7 विधानसभा मतदारसंघाचा विचार केल्यास 2019 च्या विधानसभा निवडणुकीत शिवसेनेचे 3, भाजप 2, राष्ट्रवादी काँग्रेस 1 आणि अपक्ष 1 उमेदवार विजयी झाले होते. सध्याचा विचार केल्यास रायगड जिल्ह्यात महायुतीचे वर्चस्व असल्याचे दिसून येतंय. कारण शिवसेनेचे तीनही आमदार सध्या एकनाथ शिंदे यांच्या गटात आहेत. तर अदिती तटकरे देखील महायुतीचा भाग असलेल्या अजित पवार गटासोबत आहेत.