Vidhan Parishad Election : विजयानंतर एकनाथ खडसे भावूक, सहा वर्षांच्या छळाचा पाढा वाचला, आता ईडी विरुद्ध सीडी काढण्याची वेळ?
Vidhan Parishad Election Result : ईडी आणि सीडीचा विषय योग्य वेळी काढणार असल्याचं नवनियुक्त आमदार एकनाथ खडसे यांनी म्हटलं आहे.
मुंबई: विधानपरिषदेच्या निवडणुकीचा निकाल जाहीर झाला असून यामध्ये राष्ट्रवादीच्या एकनाथ खडसे यांचा विजय झाला आहे. आपल्याला पराभूत करण्यासाठी भाजपने अनेक प्रयत्न केल्याचं सांगत एकनाथ खडसे भावूक झाले. विजयानंतर त्यांनी मदत केलेल्या सर्व आमदारांचे आभार मानले, तसेच भाजपकडून करण्यात आलेल्या गेल्या सहा वर्षाच्या छळाचा पाढाही वाचला.
खडसेंनी वाचला सहा वर्षाच्या छळाचा पाढा
राष्ट्रवादीचे नवनियुक्त आमदार एकनाथ खडसे म्हणाले की, "भाजपमधील मित्रांनी मला अतिरिक्त मदत दिली. गेल्या सहा वर्षात खूप छळवणूक झाली. ईडी वगैरे तपास यंत्रणांचा ससेमिरा मागे लावला. मंत्रिपदावर असताना खोटे आरोप करुन राजीनामा घेतला. आरोप खोटे ठरले, झोटिंग अहवाल आला, तिथेही काही नाही मिळालं. ईडी चौकशी झाली, जावयाला अटक करण्यात आली. बायको, मुलींना समज देण्यात आली. प्रॉपर्टी सीज झाली. तीन आठवड्यापूर्वी आदेश आला, माझी राहती घरं खाली करण्याचे आदेश देण्यात आले. मला बेघर करण्याचा प्रयत्न करण्यात आला."
ईडी-सीडीचा विषय योग्य वेळी काढणार
एकनाथ खडसे पुढे म्हणाले की, "माझ्या सर्व खात्यातील सर्व पैसे काढले, एकूण एक पैसा काढून घेतला. अजून छळ थांबलेला नाही. राजकारणातून मला संपवण्याचा प्रयत्न केला जात असताना असताना राष्ट्रवादीने पुनर्वसन केलं. ईडी-सीडीचा विषय योग्य वेळी काढेन, विधानपरिषदेत अनेक विषय मांडणार. राष्ट्रवादीला वाढवण्यासाठी मदत करणार आहे."
दरम्यान, विधानपरिषदेच्या निवडणुकीसाठीच्या मतमोजणीतील पहिल्या टप्प्यातील निकाल जाहीर झाले असून त्यामध्ये भाजपचे राम शिंदे, उमा खापरे, श्रीकांत भारतीय, प्रवीण दरेकर यांचा तर महाविकास आघाडीच्या रामराजे निंबाळकर, एकनाथ खडसे सचिन अहिर यांचा विजय झाला आहे.
मतमोजणीच्या पहिल्या टप्प्यानंतर एकूण आठ उमेदवारांचा विजय झाला आहे. पहिल्या फेरीमध्ये रामराजे निंबाळकर आणि उमा खापरे यांच्या कोट्यातील प्रत्येकी एक मत बाद झाल्यानंतर पहिल्या पसंतीच्या मतासाठी 25.73 चा कोटा ठरवण्यात आला होता. त्यानंतर हा निकाल जाहीर करण्यात आला.
विधानपरिषदेतील विजयी उमेदवार
रामराजे निंबाळकर- 28
एकनाथ खडसे- 29
आमश्या पाडवी- 26
सचिन अहिर- 26
प्रवीण दरेकर- 29
राम शिंदे-30
श्रीकांत भारतीय- 30
उमा खापरे- 27
महत्त्वाच्या बातम्या
