लोकांचा 'मोदी.. मोदी..' नारा, हस्तांदोलन करुन प्रियांका गांधी म्हणाल्या "ऑल द बेस्ट"

प्रियांका गांधींनी काल भाजपचा गड मानल्या जाणाऱ्या इंदुरमध्ये मोठा रोड शो केला. राजमोहल्ला ते राजबाडा असा जवळपास अडीच किमीचा हा रोड शो होता.

इंदुर : भाजपच्या अनेक प्रचार सभा, रोड शो किंवा कार्यक्रमांमध्ये 'मोदी.. मोदी..'च्या घोषणा अनेकदा पाहिल्या असतील. मात्र मध्य प्रदेशच्या इंदुरमध्ये काँग्रेस सरचिटणीस प्रियांका गांधी यांच्यासमोर भाजप कार्यकर्त्यांनी 'मोदी मोदी'च्या घोषणा दिल्या. त्यावेळी प्रियांका गांधींना चक्क गाडीतून उतरुन या घोषणाबाजी करणाऱ्या कार्यकर्त्यांना हात मिळवला.

प्रियांका गांधींचा हा व्हिडीओ सध्या सोशल मीडियावर व्हायरल होत आहे. प्रियांका गांधींचा ताफा रस्त्यावरुन जात होता. त्यावेळी रस्त्याच्या कडेला काही लोक 'मोदी मोदी' अशी घोषणाबाजी करत होते. या घोषणाबाजीचा आवाज ऐकूण प्रियांका गांधींनी गाडी थांबवून या सर्व कार्यकर्त्यांची भेट घेतली.

प्रियांका गांधींनी मोठ्या मनाने या सर्वांसोबत हसून हस्तांदोलन केलं आणि म्हटलं की, "तुम्ही तुमच्या जागी आणि मी माझ्या जागी आहे. ऑल द बेस्ट." त्यानंतर तेथे उपस्थित असलेल्या सर्वांनी प्रियांक गांधी यांनाही ऑल द बेस्ट म्हटलं. हा सगळा मजेशीर प्रसंग कॅमेऱ्यात कैद झाला आहे.

प्रियांका गांधींनी काल भाजपचा गड मानल्या जाणाऱ्या इंदुरमध्ये मोठा रोड शो केला. राजमोहल्ला ते राजबाडा असा जवळपास अडीच किमीचा हा रोड शो होता. यावेळी प्रियांका गांधी यांची एक झलक पाहण्यासाठी लोकांनी तेथे मोठी गर्दी केली होती. या रोड शोमध्ये प्रियांका गांधी यांच्यासोबत मध्य प्रदेशचे मुख्यमंत्री कमलनाथ आणि छत्तीसगडचे मुख्यमंत्री भूपेश बघेल हे देखील उपस्थित होते.