हडपसर मतदारसंघात पुन्हा मतमोजणी व्हावी, प्रशांत जगतापांनी केला अर्ज, जिल्हाधिकारी कार्यालयाकडे भरले 12 लाख 74 हजार
हडपसर विधानसभा मतदारसंघात (Hadapsar Assembly Constituency) पुन्हा एकदा मतमोजणी करण्याची मागणी शरद पवार गटाचे पराभूत उमेदवार प्रशांत जगताप (Prashant Jagtap) यांनी केली आहे.
Hadapsar Assembly Constituency : विधानसभा निवडणुकीत (Vidhansabha Election) महायुतीला (Mahayuti) मोठं यश मिळालं आहे. त्यामुळं राज्यात पुन्हा एकदा महायुतीचं सरकार स्थापन होणार आहे. दरम्यान, अनेक मतदारसंघात विरोधकांकडून EVM मशीन संदर्भात संशय व्यक्त केला जातोय. हडपसर विधानसभा मतदारसंघात (Hadapsar Assembly Constituency) देखील पुन्हा एकदा मतमोजणी करण्याची मागणी हडपसर विधानसभा मतदारसंघातील शरद पवार गटाचे पराभूत उमेदवार प्रशांत जगताप (Prashant Jagtap) यांनी केली आहे. EVM मशीन व VVPAT पडताळणीसाठी प्रशांत जगताप यांनी अर्ज केला आहे. यासाठी जगताप यांनी 12 लाख 74 हजार रुपयांचे शुल्क भरले आहे.
हडपसर मतदार संघात पुन्हा मतमोजणी व्हावी
महाराष्ट्र राज्य विधानसभेचे निकाल लागल्यानंतर केवळ राज्यातच नव्हे, तर संपूर्ण देशात EVM बद्दल संशय व्यक्त केला जात आहे. देश विदेशातील जाणकार याबाबत आपले मत मांडत असून EVM मध्ये गैरप्रकार झाल्याची अनेकांची भावना आहे. हडपसर विधानसभा मतदारसंघाचे राष्ट्रवादी काँग्रेस पार्टी शरदचंद्र पवार पक्षाचे उमेदवार प्रशांत जगताप यांनीही पत्रकार परिषदेच्या माध्यमातून EVM प्रणालीवर प्रश्नचिन्ह उपस्थित करत याबाबत काही पुरावेही सादर केले. हडपसर मतदार संघात पुन्हा मतमोजणी व्हावी यासाठी त्यांनी अर्ज केला आहे. यासाठी जिल्हाधिकारी कार्यालयाकडे 12 लाख 74 हजार रुपये शुल्कही त्यांनी चलनाच्या माध्यमातून जमा केले आहेत.
देशद्रोही लोकांवर कडक कारवाई करणे हेच आपले मुख्य ध्येय
कोण आमदार होणार, कोणाची सत्ता येणार एवढ्या पुरताच हा प्रश्न मर्यादित नाही. जनतेच्या मतांची झालेली चोरी थांबवणे, लोकशाहीचे सुरु असलेले वस्त्रहरण रोखणे, या प्रकरणात दोषी असलेल्या देशद्रोही लोकांवर कडक कारवाई करणे हेच आपले मुख्य ध्येय असल्याची भावना प्रशांत जगताप यांनी व्यक्त केली आहे. डॉ. बाबासाहेब आंबेडकर यांनी देशाला दिलेले संविधानावर श्रद्धा असलेला प्रामाणिक कार्यकर्ता म्हणून लोकशाहीच्या रक्षणासाठी हा लढा न्यायालयीन पातळीसह रस्त्यावरही सुरुच असेल. आपला न्यायव्यवस्थेवर विश्वास असून या लढ्यातून नक्कीच न्याय मिळेल हा विश्वासही प्रशांत जगताप यांनी व्यक्त केला आहे.
हडपसर विधानसभा मतदारसंघात शऱद पवार गट विरुद्ध अजित पवार गट असी लढत झाली होती
हडपसर विधानसभा मतदारसंघात राष्ट्रवादी काँग्रेस शरद पवार गटाकडून पुण्याचे माजी महापौर प्रशांत जगताप यांनी निवडणूक लढवली होती. तर त्यांच्या विरोधात विद्यमान आमदार चेतन तुपे हे अजित पवार गटाकडून निवडणूक लढवत होते. या निवडणुकीत चेतन तुपे यांनी पुन्हा विजय मिळवला आहे.
महत्त्वाच्या बातम्या
