उमेदवारी अर्ज भरण्यासाठी गेलेल्या उमेदवाराला 5 हजारांचा दंड, अहमदनगरच्या नेवासामधील घटना

एखाद्या उमेदवाराला उमेदवारी अर्ज दाखल करताना दंड होण्याची राज्यातील ही पहिलीच घटना असावी. नेवासा तालुक्यातील देवगाव येथील मच्छिंद्र देवराव मुंगसे असे कारवाई झालेल्या अपक्ष उमेदवाराचं नाव आहे.

शिर्डी : विधानसभा निवडणुकीसाठी उमेदवारी अर्ज भरण्यासाठी अनामत रक्कम प्लास्टिक पिशवीत आणल्याने एका उमेदवाराला पाच हजार रुपयांचा दंड भरावा लागला आहे. अहमदनगर जिल्ह्यातील नेवासा येथे हा प्रकार घडला आहे. एखाद्या उमेदवाराला उमेदवारी अर्ज दाखल करताना दंड होण्याची राज्यातील ही पहिलीच घटना असावी.

नेवासा तालुक्यातील देवगाव येथील मच्छिंद्र देवराव मुंगसे असे कारवाई झालेल्या अपक्ष उमेदवाराचं नाव आहे. विधानसभा निवडणुकीची धामधूम सुरु होताच प्लास्टिक बाळगल्याने नेवासा नगरपंचायतीने ही कारवाई केली. सोमवारी देवगाव येथील मुंगसे यांनी अनामत रक्कम भरण्यासाठी दहा हजाराची चिल्लर आणली होती. त्यामध्ये पाचशे रुपयाचे वीस बंडल प्लास्टिक पॅकेटमध्ये आणले होते.

प्लास्टिक बंदी असताना सदरची रक्कम ही प्लास्टिकमध्ये आणल्याचे निवडणूक निर्णय अधिकारी शाहूराज मोरे आणि नगरपंचायतचे मुख्याधिकारी तसेच सहाय्यक निवडणूक अधिकारी समीर शेख यांच्या हा प्रकार लक्षात आला. त्यांनी मुंगसे यांना पाच हजाराचा दंड ठोठावला.

दंड भरताना एक हजाराची चिल्लरसह पाच हजार रुपये भरुन दंडाची पावती आणि उमेदवारी अर्ज भरताना एक हजाराच्या चिल्लरसह दहा हजाराची अनामत रक्कम मुंगशे यांना भरावी लागली. नेवासा येथे नगरपंचायत आहे. नगरपंचायत असूनही येथे प्लास्टिकविरोधी फार कारवाई झालेली नाही. मात्र आजच्या या कारवाईने सर्वांचेच लक्ष वेधून घेतलं आहे.