काँग्रेस अध्यक्ष राहुल गांधींकडे 15 कोटींची संपत्ती, प्रतिज्ञापत्रात दिली माहिती

राहुल गाधींनी दाखल केलेल्या प्रतिज्ञापत्रात दिलेल्या माहितीप्रमाणे त्यांच्या नावे एकही गाडी नाही. तसेच त्यांनी आई सोनिया गांधी यांच्याकडून 5 लाख रुपयांच कर्ज देखील घेतलं आहे.

नवी दिल्ली : काँग्रेस अध्यक्ष राहुल गांधी यांनी वायनाड येथून आपला उमेदवारी अर्ज दाखल केला. अर्ज भरतांना दाखल केलेल्या प्रतिज्ञापत्रानुसार राहुल गांधी यांच्या नावे एकूण 15.88 कोटींची मालमत्ता आहे. गेल्या पाच वर्षात राहुल गांधी यांच्या मालमत्तेत एकूण 6.48 कोंटींची वाढ झाली आहे.

राहुल गांधी यांच्याकडे 2014 मध्ये एकूण 9.4 कोटींची संपत्ती होती. विशेष म्हणते त्यांनी आई सोनिया गांधी यांच्याकडून 5 लाख रुपयांच कर्ज देखील घेतलं आहे.

राहुल गांधींकडे 15 कोटींची मालमत्ता

राहुल गांधी यांच्याकडे 5 कोटी 50 लाख 58 हजार रुपयांची जंगम मालमत्ता आहे. तर स्थावर मालमत्तेची किंमत 10 कोटी 8 लाख रुपयांची स्थावर मालमत्ता आहे. अशारीतीने त्यांच्याकडे एकूण 15 कोटी 80 लाख रुपयांची मालमत्ता आहे.

राहुल गांधी यांच्याकडे फक्त 40 हजार रुपये रोख रक्कम आहे. 17 लाख 93 हजार रुपयांची बँक डिपॉझिट आहे. यंग इंडियनचे एकूण 1900 शेअर्स त्यांच्याकडे आहेत, ज्याची किंमत 19 लाख रुपये आहे. पीपीएफमध्ये 39 लाख 89 हजार रुपये आहेत. याशिवाय 333.30 ग्रॅम सोनं आहे, ज्याची किंमत 2 लाख 91 हजार रुपये आहे. तर म्युचुअल फंडमध्ये एकूण 5 कोटी 19 लाख रुपये आहेत. अशी एकूण 5 कोटी 80 लाखांची जंगम मालमत्ता राहुल गांधीकडे आहे.

महरोलीच्या सुल्तानपूरमध्ये प्रियांका गांधी वाड्रा आणि राहुल गांधी यांच्या नावे संयुक्तरित्या 1 कोटी 32 लाखांची जमीन आहे. गुरुग्राममध्ये सिग्नेचर टॉवर बीमध्ये व्यावसायिक इमारत आहे, ज्याची किंमत 8 कोटी 75 लाख रुपये आहे. अशी एकूण 10 कोटी 8 लाखांची स्थावर मालमत्ता राहुल गांधींकडे आहे.

राहुल गांधींच्या नावे 72 लाखांचं लोन

राहुल गाधींनी दाखल केलेल्या प्रतिज्ञापत्रात दिलेल्या माहितीप्रमाणे त्यांच्या नावे एकही गाडी नाही. तसेच त्यांच्या नावे 72 लाख रुपयांचं कर्ज आहे. 5 लाख रुपयांचं लोन त्यांनी आई सोनिया गांधी यांच्याकडूनही घेतलं आहे.