Andheri East Bypoll Election 2022 : अंधेरी पोटनिवडणुकीतील (Andheri East Bypoll 2022) शिवसेना ठाकरे गटाच्या उमेदवार ऋतुजा लटके (Rutuja Latke) यांनी सध्या सुरू असलेल्या वादावर पहिली प्रतिक्रिया दिली आहे. आता, निवडणूक लढणार तर मशाल या निवडणूक चिन्हावरच लढणार असून माझ्यावर कोणताही दबाव नाही, असे त्यांनी स्पष्ट केले.
ऋतुजा लटके यांनी एबीपी माझाशी (ABP Majha) बोलताना सांगितलं की, "माझ्यावर कोणताही दबाव नाही. मी मुख्यमंत्री एकनाथ शिंदे (CM Eknath Shinde) यांना भेटलेले नाही. अंधेरीतील पोटनिवडणूक मी मशाल चिन्हावरच लढणार" तसेच, "आमची जी निष्ठा आहे ती, उद्धव साहेबांसोबतच आहे. माझे पती रमेश लटके (Ramesh Latke) यांचीही निष्ठा उद्धव ठाकरे (Uddhav Thackeray) आणि बाळासाहेबांसोबत होती. आता मी महापालिका आयुक्तांची भेट घेणार आहे. राजीनाम्यासंदर्भात पुन्हा एकदा विनंती करणार आहे की, मला आजच्या आज राजीनामा देण्यात यावा.", असंही त्या म्हणाल्या.
निवडणूक लढवणार तर ती मशाल चिन्हावरच : ऋतुजा लटके
"मला अशी माहिती देण्यात आली आहे की, सगळी प्रक्रिया पूर्ण झालेली आहे. फक्त एक सही शिल्लक आहे.", अशी माहितीही ऋतुजा लटके यांनी दिली. तसेच, त्यांनी बोलताना मी निवडणूक लढवणार तर ती मशाल या चिन्हावरच लढणार, असं पुन्हा एकदा स्पष्ट केलं.
दरम्यान, ठाकरे गटाच्या उमेदवार ऋतुजा लटके यांनाच शिंदे गटात आणण्याचा प्रयत्न मुख्यमंत्री करीत असल्याची चर्चा सुरु झाल्या आहेत. अंधेरी पोटनिवडणुकीत ठाकरेंना शह देण्यासाठी शिंदेंची ही नवी रणनीती असल्याची माहिती मिळत आहे. एबीपी माझाशी बोलताना ऋतुजा लटके यांनी सर्व चर्चांना पूर्णविराम देत, आमची निष्ठा उद्धव ठाकरेंशीच असल्याचं स्पष्ट केलं आहे.
नाव आणि चिन्हाच्या लढाईनंतर सध्या राज्यभर चर्चेत असलेल्या अंधेरी पूर्व विधानसभा पोटनिवडणुकीत नवीन ट्वीस्ट आला आहे. मंत्रिपदाची ऑफर देऊन ठाकरे गटाच्या उमेदवार ऋतुजा लटके यांना खेचण्याचा शिंदे गटाचा प्रयत्न आहे, असा गंभीर आरोप शिवसेना नेते अनिल परब यांनी केला आहे. एवढंच नाही तर मुंबई महापालिकेच्या कर्मचारी असलेल्या ऋतुजा यांचा राजीनामा मंजूर होऊ नये म्हणून दबाव टाकला जातोय, असा आरोप देखील ठाकरे गटानं केला आहे. ऋतुजा लटके यांचा राजीनामा तात्काळ मंजूर व्हावा म्हणून ठाकरे गटानं कोर्टात धाव घेतली असून त्यावर आजच सुनावणी होणं अपेक्षित आहे.
महत्त्वाच्या इतर बातम्या :