Sahil Wakode : साहिलचा 'आयफोन' ठरतोय कोडं; 47 मिनिटांचा 'तो' घटनाक्रम उलगडणार कसा? एका 'पॅटर्न लॉक'मध्ये अडकलं सगळं, पोलिस घेणार हायटेक मदत
Sahil Wakode : साहिलच्या फोनला पॅटर्न लॉक असून, हा पॅटर्न त्याच्या ओळखीच्या कोणालाही माहित नव्हता. यामुळे पोलिसांना सध्या फोनमधील डेटा मिळवणे कठीण जात आहे.
मुंबई: आयआयटी बॉम्बेचा (IIT Bombay) विद्यार्थी साहिल वाकोडे (Sahil Wakode) याच्या मृत्यूचा तपास करणाऱ्या मुंबई क्राईम ब्रांचसमोर (गुन्हे शाखा) आता त्याचा लॉक असलेला 'iPhone 17' हे सर्वात मोठे आव्हान ठरत आहे. साहिलच्या फोनला पॅटर्न लॉक असून, हा पॅटर्न त्याच्या ओळखीच्या कोणालाही माहित नव्हता. यामुळे पोलिसांना सध्या फोनमधील डेटा मिळवणे कठीण जात आहे.(Sahil Wakode)
फोन अनलॉक झाल्यानंतर अनेक महत्त्वाच्या प्रश्नांची उत्तरे मिळतील, अशी पोलिसांना आशा आहे. विशेषतः १८ सप्टेंबर रोजी परीक्षेदरम्यान साहिलने फोनवर नेमके काय सर्च (शोध) केले होते आणि परीक्षा केंद्रातून बाहेर पडल्यानंतर त्याच्यासोबत काय घडले, याची महत्त्वपूर्ण माहिती या फोनमधून मिळू शकते.(Sahil Wakode)
Sahil Wakode : ४७ मिनिटांच्या घटनाक्रमाचा शोध सुरू
१८ सप्टेंबर रोजी परीक्षेदरम्यान साहिलवर मोबाईल वापरल्याचा आरोप झाला होता. सीसीटीव्ही (CCTV) फुटेजमध्ये प्राध्यापक सूर्यनारायण डुल्ला यांनी साहिलला परीक्षा केंद्रातून बाहेर जाण्यास सांगितल्याचे समोर आले आहे. दुपारी सुमारे १२:३८ वाजता साहिल परीक्षा केंद्रातून बाहेर पडला आणि सुमारे १:२५ वाजता तो हॉस्टेलमधील आपल्या खोलीत पोहोचला.
क्राईम ब्रांच आता या सुमारे ४७ मिनिटांमधील घटनाक्रमाची साखळी जोडण्याचा प्रयत्न करत आहे. परीक्षा केंद्रातून ते हॉस्टेलपर्यंतच्या मार्गावरील सर्व सीसीटीव्ही फुटेज तपासले जात आहेत, जेणेकरून या काळात साहिल कुठे गेला होता आणि त्याच्यासोबत काय घडले, याचा शोध घेता येईल.
Sahil Wakode : नवीन मॉडेलमुळे डेटा मिळवण्यात अडचणी
साहिलकडे 'iPhone 17' हा फोन होता. पोलिसांकडे उपलब्ध असलेले फॉरेन्सिक टूल जुन्या आयफोन मॉडेलमधून डेटा काढण्यासाठी सक्षम आहेत; मात्र या नवीन मॉडेलमधून डेटा मिळवण्यात सध्या अडचणी येत आहेत. फोनमधील डेटा एन्क्रिप्टेड (Encrypted) असल्याने पॅटर्नशिवाय तो अनलॉक करणे सोपे नाही.
त्यामुळे आता क्राईम ब्रांच अशा इतर संस्थांची मदत घेण्याचा विचार करत आहे, ज्यांच्याकडे नवीन आयफोन आणि डिजिटल डेटा तपासण्यासाठी अधिक प्रगत (Advanced) तंत्रज्ञान उपलब्ध आहे.
Sahil Wakode : अनेक जणांची चौकशी आणि तपास सुरू
पोलिसांनी साहिलचा लॅपटॉपही जप्त करून फॉरेन्सिक तपासासाठी पाठवला आहे. याशिवाय परीक्षा कक्ष, कॅम्पस आणि हॉस्टेल परिसरातील सीसीटीव्ही फुटेजची कसून पाहणी सुरू आहे. या प्रकरणात सुरुवातीला पवई पोलीस ठाण्यात एफआयआर (FIR) नोंदवण्यात आला होता, त्यानंतर हा तपास क्राईम ब्रांचकडे सोपवण्यात आला. आतापर्यंत २० हून अधिक जणांचे जबाब नोंदवण्यात आले असून, यामध्ये विद्यार्थी आणि संस्थेच्या कर्मचाऱ्यांचा समावेश आहे. तसेच परीक्षा कक्षात उपस्थित असलेल्या विद्यार्थ्यांकडे आणि परीक्षेवर देखरेख ठेवणाऱ्या शिक्षकांकडेही चौकशी करण्यात आली आहे. क्राईम ब्रांच आता फोन, लॅपटॉप, सीसीटीव्ही फुटेज आणि लोकांचे जबाब यांची सांगड घालून १८ सप्टेंबर रोजी घडलेल्या संपूर्ण घटनाक्रमाचे सत्य शोधण्याचा प्रयत्न करत आहे.
महत्त्वाच्या बातम्या
