Pune Hospital Bomb Case: हडपसर बॉम्ब प्रकरणात मोठी अपडेट, आरोपीला नागपूर रेल्वे स्टेशनवर पकडलं; गुन्ह्याची कबुली दिली, प्लॅटफॉर्म 6 वर नेमकं काय घडलं?

Pune Hospital Bomb Case: पुण्यातील हडपसर परिसरात असलेल्या हॉस्पिटलमध्ये जिवंत बॉम्ब ठेवणाऱ्या संशयित आरोपीला अटक करण्यात महाराष्ट्र एटीएसला मोठे यश आले आहे.

Pune Hospital Bomb Case

Source : ABP Majha

Pune Hospital Bomb Case: पुण्यातील (Pune) हडपसर (Hadapsar) परिसरात असलेल्या हॉस्पिटलमध्ये जिवंत बॉम्ब (IED) ठेवून संपूर्ण शहरात खळबळ उडवून देणाऱ्या संशयित आरोपीला अटक करण्यात महाराष्ट्र एटीएसला (दहशतवाद विरोधी पथक) मोठे यश आले आहे. नागपूर रेल्वे स्थानकावर (Nagpur Railway Station) दबा धरून बसलेल्या एटीएसच्या पथकाने या आरोपीला मोठ्या शिताफीने ताब्यात घेतले.

Pune Hospital Bomb Case: प्लॅटफॉर्म क्रमांक 6 वर थरारक कारवाई

मिळालेल्या माहितीनुसार, शिवाजी राठोड असे ताब्यात घेतलेल्या संशयित आरोपीचे नाव आहे. संशयित आरोपी हा आझाद हिंद एक्सप्रेसने प्रवास करत होता. ही गाडी नागपूर रेल्वे स्थानकावरील प्लॅटफॉर्म क्रमांक 6 वर आली असता, तो गाडीतून उतरत असतानाच आधीच सज्ज असलेल्या एटीएसच्या पथकाने त्याला चहुबाजूंनी घेरून ताब्यात घेतले. सध्या या आरोपीला नागपूर एटीएसच्या कार्यालयात आणण्यात आले असून त्याची कसून चौकशी सुरू आहे.

Pune Hospital Bomb Case: नेमके प्रकरण काय?

बुधवारी सायंकाळी पुण्यातील हडपसर परिसरातील कामधेनू इस्टेट येथे असलेल्या उषाकिरण रुग्णालयाच्या प्रवेशद्वारासमोर बॉम्बसदृश वस्तू आढळल्याने परिसरात एकच खळबळ उडाली होती. घटनेची माहिती मिळताच पोलिस, बॉम्बशोधक व नाशक पथक (बीडीडीएस), अग्निशमन दल आणि इतर सुरक्षा यंत्रणा तातडीने घटनास्थळी दाखल झाल्या. या घटनेमुळे काही काळ परिसरात भीती आणि तणावाचे वातावरण निर्माण झाले होते. रुग्णालयाच्या प्रवेशद्वाराजवळ संशयास्पद वस्तू दिसून आल्याने नागरिकांनी तत्काळ पोलिसांना माहिती दिली. त्यानंतर पोलिसांनी परिसर तातडीने सील करत नागरिकांना सुरक्षित अंतरावर हलवले होते.

घटनास्थळी पोलीस आयुक्त अमितेश कुमार, अपर पोलीस आयुक्त मनोज पाटील यांनी आढावा घेतला. पोलिस आणि सुरक्षा यंत्रणांनी बॉम्ब वेळेतच निकामी केल्याने मोठी दुर्घटना टळली. या प्रकरणाच्या तपासासाठी एटीएस आणि आयबी (इंटेलिजन्स ब्युरो) सारख्या केंद्रीय यंत्रणा कामाला लागल्या होत्या. या संवेदनशील प्रकरणाचा छडा लावण्यासाठी पोलिसांनी परिसरातील 100 हून अधिक सीसीटीव्ही कॅमेऱ्यांचे फुटेज तपासले होते. संशयास्पद हालचालींवरून 15 ते 18 जणांची कसून चौकशीही करण्यात आली होती. अखेर तांत्रिक पुरावे आणि सीसीटीव्ही फुटेजच्या मदतीने आरोपीच्या चेहऱ्यावरून पडदा उठला आणि त्याचे लोकेशन नागपूरमध्ये ट्रॅक झाले. आरोपीला नागपूर रेल्वे स्थानकावरून अटक करण्यात आली असून, सध्या त्याला नागपूर एटीएसच्या कार्यालयात आणण्यात आले आहे. तर आरोपीने नागपूर एटीएसला आपल्या गुन्ह्याची कबुली दिल्याची माहिती समोर येत आहे.

आणखी वाचा