माता न तूं वैरिणी! प्रियकराच्या मदतीने पोटच्या मुलाचा खून

जालना जिल्ह्यातील अंबड तालुक्यात आज एक खळबळजनक घटना उघडकीस आली. एका आईनेच आपल्या पोटच्या मुलाची प्रियकराच्या मदतीने हत्या केल्याचं उघडकीस आलंय.

सांकेतिक छायाचित्र

जालना : जिल्ह्यातील अंबड तालुक्यात आज एक खळबळजनक घटना उघडकीस आली. एका आईनेच आपल्या पोटच्या मुलाची प्रियकराच्या मदतीने हत्या केल्याचं उघडकीस आलंय. प्रियकराच्या मदतीने आपल्याच 6 वर्षांच्या मुलाचा अपहरणाचा बनाव करून हत्या केल्याचं समोर आल्याने पोलीसही सुन्न झालेत.

अंबड तालुक्यातील डावरगाव येथील महिला शीतल उघडे ही काल आपल्या भावाला रुग्णालयात उपचारासाठी घेऊन आली. तिच्याजवळ एक सहा वर्षांचा मुलगा होता. उपचारानंतर मेडिकल आणण्यासाठी म्हणून रुग्णालयाबाहेर आली. परंतु, सोबत असलेला सहा वर्षाचा मुलगा आदित्य याला कुठेतरी थांबवण्याचा बहाणा करून तिने जवळच असलेल्या प्रियकराकडे मुलाला सोपवले. अर्थात हा प्रियकर अनोळखी असल्याचाही बनाव केला. सदर महिलेने आपला भाऊ तसेच आजूबाजूच्या लोकांची खात्री व्हावी यासाठी समोरचा प्रियकर अनोळखी असून मुलाला काही काळ त्याच्याजवळ ठेवताना त्याचा नंबर घेतल्याचा बहाणा देखील केला. थोड्याच वेळात ही महिला आणि तिचा भाऊ परत आल्यानंतर तिथे आपला मुलगा आणि ज्याच्या सांभाळी घातले होते तो व्यक्ती तिथे नसल्याचं लक्षात आलं. दरम्यान बराच शोधाशोध केल्याचं नाटक केल्यानंतर तिने अंबड पोलीस ठाण्यात आपल्या मुलाचे अपहरण झाल्याची तक्रार दिली. पोलिसांना संशय येऊ नये म्हणून प्रियकराचा मोबाईलनंबर देखील दिला आणि इथेच पोलिसांना तपासाची दिशा मिळाली.

पोलिसांकडे आलेल्या तक्रारीवरून आणि दिवसा घडलेल्या या अपहरण नाट्याने पोलीस देखील चक्रावून गेले. यातच रात्री उशिरा अंबड शहरापासून 6 किमी अंतरावरील घनसावंगी रोडवर एका लहान मुलाचा शेतात मृतदेह आढळुन आला, ज्याच्या तोंडात कापडी बोळा कोंबलेला दिसल्याने मुलाची हत्या झाल्याचे उघड झाले. पंचनामा झाल्यानंतर ज्या महिलनेने अपहरण केल्याची तक्रार दिली होती. तिचाच सहा वर्षांचा मुलगा आदित्य असल्याची खात्री झाली.

असा झाला खुनाचा उलगडा..
अपहरण झालेल्या मुलाची हत्या झाल्याचे उघड झाल्याने पोलिसांनी रात्रीतून मुलाच्या आईने  दिलेल्या नंबरवरून पैठण येथील रहिवासी असलेला नवनाथ जगधनेला ताब्यात घेतलं. सदर आरोपीने सुरुवातीला उडवा उडवीची उत्तरे दिली. मात्र, फिर्यादी महिला आणि आरोपीच्या माहिती देण्यावरून पोलिसांना संशय आला आणि पोलिसांनी आपला खाक्या दाखवताच आरोपीने अपहरण झाल्याची मुलाची फिर्याद देणाऱ्या आईसोबतच आपले प्रेमसबंध असल्याने तसेच हा लहान मुलगा आपल्या प्रेमात अडसर होत असल्याच्या कारणाने हत्या केल्याची कबुली दिली. यावेळी पोलिसांनी मयत आदित्यची आई असलेल्या शीतल उघडे हिला देखील अटक केलं. या प्रकरणात या दोघांना साथ देणारा सहआरोपी गणेश रोकडे यालाही अटक केलंय. या संपूर्ण घटनेची आरोपींनी पोलिसांसमोर कबुली दिल्याने या प्रकरणी अंबड पोलिसांनी या तिघांविरुद्ध खुनाचा गुन्हा दाखल केलाय.

अंबड पोलीस ठाण्याचे पोलीस उपनिरीक्षक सुग्रीव चाटे यांनी दिलेल्या माहितीनुसार संशयावरून अटक करण्यात आलेले आरोपी नवनाथ जगधने आणि गणेश रोकडे यांनी लहानग्या आदित्यची हत्या करून त्याच्या मृतदेह घनसावंगी रोडवरील नाल्याजवळ फेकल्याची रात्री कबुली दिली. एकीकडे या गुन्ह्याचा छडा लावण्यात पोलिसांना लवकर यश आलं असलं तरी अपहरणाचा बनाव करून हत्या झालेल्या मुलाचा जीव वाचवण्यात पोलिसांना मात्र अपयश आलं. दरम्यान या घटनेची माहिती गावात आणि तालुक्यात पसरताच सर्वत्र हळहळ व्यक्त होत आहे.