Congress : काँग्रेस नेत्यांवर वसुलीचा गंभीर आरोप, गोवा वसुली प्रकरणाचे मुंबई कनेक्शन
Goa Congress Controversy: गोव्यातील वन गोवा प्रकल्पातील कथित खंडणी प्रकरणात मुंबई पोलिसांनी कारवाई केल्यानंतर भाजपने काँग्रेस नेते माणिकराव ठाकरेंवर वसुलीचा आरोप केला आहे.
मुंबई: गोव्यात आगामी विधानसभा निवडणुकीच्या तोंडावर राजकीय वातावरण कमालीचे तापले असून भाजपने काँग्रेसवर खंडणी आणि वसुलीचे अत्यंत गंभीर आरोप केले आहेत. भाजपच्या सोशल मीडिया विभागाचे पदाधिकारी प्रकाश गाडे यांनी काँग्रेसचे ज्येष्ठ नेते आणि गोव्याचे प्रभारी माणिकराव ठाकरे यांच्यावर थेट निशाणा साधला आहे.
गोव्यातील बिचोलीम तालुक्यातील करापूर येथील वन गोवा प्रकल्पाभोवती सुरू असलेल्या वादात मुंबई पोलिसांनी सिद्धेश तारी आणि प्रितेश साळगावकर या दोघांना कथित खंडणी प्रकरणात अटक केली आहे. या अटकेनंतर आता या प्रकरणाचे थेट मुंबई कनेक्शन आणि राजकीय संबंध उघडकीस येत असल्याचा दावा भाजपने केला आहे.
भाजप नेते प्रकाश गाडे यांनी या प्रकरणावरून काँग्रेसवर जोरदार हल्लाबोल केला. "गोवा काँग्रेसचे प्रभारी माणिकराव ठाकरे यांनी महाराष्ट्रातील वसुलीची पद्धत आता गोव्यातही सुरू केली आहे. काल मुंबईत अटक करण्यात आलेली वसुली टोळी ही थेट काँग्रेसचीच निघाली आहे," असा गंभीर आरोप गाडे यांनी केला.
गाडे पुढे म्हणाले की, "अटक करण्यात आलेल्या सिद्धेश तारी याच्यासोबत काँग्रेसचे प्रदेशाध्यक्ष गिरीश चोडणकर आणि विरोधी पक्षनेते युरी आलेमाव यांचे फोटो समोर आले आहेत. विकास प्रकल्पांना विरोध करणे आणि खंडणी न मिळाल्यास प्रोजेक्ट बंद पाडणे ही काँग्रेसची जुनीच सवय आहे."
गोवा काँग्रेस प्रभारी माणिकराव ठाकरे यांनी वसुलीची पद्धत गोव्यात पण लावून दिली वाटत..
— Prakash Gade (@PrakashGade13) September 2, 2026
काल मुंबईत अटक करण्यात आलेली वसुली टोळी ही तर कॉंग्रेसची निघाली!
आता त्याच वसुलीबाज अटक केलेली सिद्धेश तारी यांच्यासोबत काँग्रेसचे प्रदेशाध्यक्ष गिरीश चोडणकर आणि विरोधी पक्षनेते युरी आलेमाव… pic.twitter.com/qnhYtQpds3
आर्थिक व्यवहारांवर अनेक गंभीर प्रश्न
करापूर-सारवण परिसरात या प्रकल्पाला विरोध करण्यासाठी स्थानिक नागरिकांनी आंदोलन केले होते. मात्र, आता समोर आलेल्या एका कथित ऑडिओ क्लिपमुळे या प्रकरणाभोवती खंडणीचे सावट निर्माण झाले आहे. या ऑडिओमध्ये आर्थिक देवाणघेवाणीचा स्पष्ट उल्लेख ऐकू येत असल्याचा दावा केला जात आहे. या संभाषणात काही लोकांच्या सह्या, काम थांबवणे आणि आंदोलनाबाबत चर्चा होत असल्याचे समोर आले आहे.
या प्रकरणात एकूण 41 लाखांच्या कथित व्यवहारांचा उल्लेख समोर आला असल्याचा दावा करण्यात येत आहे. आंदोलनाचा वापर आर्थिक फायद्यासाठी केला गेला का? आणि या कथित वसुलीच्या जाळ्यात आणखी कोणत्या मोठ्या राजकीय व्यक्तींचा सहभाग आहे? याचा शोध आता तपास यंत्रणा घेत आहेत.
या संपूर्ण प्रकरणाची सत्यता समोर येण्यासाठी कथित ऑडिओ क्लिपची फॉरेन्सिक आणि तांत्रिक तपासणी करण्याची मागणी होत आहे. संभाषणातील व्यक्तींचे फोन कॉल्स, व्हॉट्सॲप चॅट्स, बँक व्यवहार आणि डिजिटल पुराव्यांची सखोल चौकशी करून या आर्थिक व्यवहारांची साखळी स्पष्ट केली जावी, अशी मागणी जोर धरत आहे.
ही बातमी वाचा:
महत्त्वाच्या बातम्या
