दोन दिवसांत दोन लाचखोर अधिकारी गजाआड, दोघेही वर्गमित्र असल्याची माहिती

दोन दिवसांत दोन लाचखोर अधिकारी गजाआड झाले आहे. पहिले पाटोदा पंचायत समितीचे गटविकास अधिकारी नारायण मिसाळ तर दुसरे माजलगावचे उपजिल्हाधिकारी श्रीकांत गायकवाड आहेत. विशेष म्हणजे हे दोघेही वर्गमित्र आहेत.

बीड : माजलगावचे उपजिल्हाधिकारी श्रीकांत गायकवाड यांना 65 हजारांची लाच घेताना एसीबीच्या अधिकाऱ्यांनी अटक केली आहे. माजलगावच्या शासकीय विश्रामगृहामध्ये त्यांच्या चालकामार्फत ही लाच त्यांनी स्वीकारली. त्यानंतर ही कारवाई करण्यात आली आहे.

विशेष म्हणजे 1 दिवसापूर्वी त्यांचे वर्गमित्र असलेले पाटोदा पंचायत समितीचे गटविकास अधिकारी नारायण मिसाळ यांना देखील लाच घेताना एसीबीच्या अधिकाऱ्यांनी अटक केली आहे आणि त्यांना भेटण्यासाठी गायकवाड हे एसीबीच्या कार्यालयात गेले होते. त्यानंतर तेथून थेट माजलगावला गेले आणि माजलगावमध्ये आपल्या चालकाच्या मार्फत लाच स्वीकारताना एसीबीच्या अधिकाऱ्यांनी त्यांना देखील अटक केली आहे. सलग दोन दिवस झालेल्या या कारवाईमुळे भ्रष्ट अधिकाऱ्यांचे मात्र चांगलेच धाबे दणाणले आहेत.

वाळूची वाहतूक सुरू करायची असेल तर अगोदर हप्ता द्या दुसऱ्याकडून एक लाख दहा हजार घेतो. पण तुम्ही जवळचे आहेत म्हणून 65 हजार रुपय द्या, असा सवांद उपजिल्हाधिकारी गायकवाड आणि तक्रारदारामध्ये झाला होता आणि त्यानंतर तक्रारदाराने याची तक्रार केल्यानंतर जालना येथील एसीबीच्या अधिकाऱ्यांनी गायकवाड आणि त्यांचा चालक लक्ष्मण काळे यांना अटक केली आहे.

ही कारवाही होण्याच्या एक दिवस अगोदरच बीड येथील एसीबीच्या पथकाने पाटोदाचे गट विकास अधिकारी नारायण पिसाळ यांना 35 हजार रुपयांची लाच घेताना रंगेहाथ पकडलं होतं आणि त्यानंतर झालेली ही दुसरी कारवाई मोठी मानली जात आहे.