कोल्हापूर जिल्ह्यातून हद्दपार असलेल्या रेकॉर्डवरील गुन्हेगाराकडून खंडणीची मागणी
Kolhapur Crime : पोलिसांनी संशयित आरोपी हद्दपार उमेश कोळापटे, तानाजी कोळापटे (रा.बालिंगा पाडळी) यांच्यासह अन्य दोन साथीदारांवर खंडणीचा गुन्हा दाखल करण्यात आला आहे.
Kolhapur Crime : कोल्हापूर जिल्ह्यातून हद्दपार करण्यात आलेल्या रेकॉर्डवरील गुन्हेगाराने बोंद्रेनगर परिसरात बालिंगा पाडळी या ठिकाणी खंडणी मागून दहशत निर्माण केल्याचा प्रकार घडला. पोलिसांकडून संशयित आरोपी हद्दपार उमेश कोळापटे, तानाजी कोळापटे (रा. बालिंगा पाडळी) यांच्यासह अन्य दोन साथीदारांवर खंडणीचा गुन्हा दाखल करण्यात आला आहे. ज्ञानदेव कबु घुरखे यांनी दिलेल्या फिर्यादीनंतर कारवाई करण्यात आली.
घरात घुसून दमदाटी करत मारहाण
फिर्यादी घुरखेंच्या घरासमोर संशयित आरोपी उमेश आणि तानाजी कोळापटे हे राहण्यास आहेत. उमेशवर यापूर्वीही गुन्हे दाखल आहेत. सध्या तो जिल्ह्यातून हद्दपार आहे. उमेशला जिल्ह्यातून हद्दपार केले असतानाही अनोळखी दोघांना घेऊन फिर्यादीच्या घरासमोर फिरत होता. फिर्यादी घुरखेच्या घरात घुसून उमेशने कानशिलात लगावली आणि दहा हजार रुपयांची खंडणी मागितली. खंडणी दिली नाही तर तुला सोडणार नाही, असे म्हणून मारहाण केली. तसेच घराचा दरवाजा मोडला. घरातील प्रापंचिक साहित्यही विस्कटले. तसेच सोबत असलेल्यांनीही लाथाबुक्यांनी मारहाण केली.
संशयित आरोपी तानाजीने तलवार फिरवत येवून पैसे देणार की नाही, असे म्हणून ठार मारण्याची धमकी दिली. आमच्यावर खूप गुन्हे दाखल आहेत. कोणी काही वाकडे करू शकत नाही, तू पैसे दिले नाहीस तर तुला बघून घेतो, असे धमकावून दहशत माजविल्याची फिर्याद घुरखे यांनी आज करवीर पोलीस ठाण्यात दिली. त्यानुसार पोलिसांनी दोघांसह अन्य अनोळखी दोघांवर असा एकूण चौघावर खंडणीचा गुन्हा दाखल करण्यात आला आहे.
इतर महत्वाच्या बातम्या :
महत्त्वाच्या बातम्या
