प्रेमाचा त्रिकोण; पतीचा खून तर पत्नी आणि प्रियकराची आत्महत्या

मनातील घालमेल आणि बैचेनी पत्नीला देखील स्वस्थ बसू देत नव्हती त्यामुळे पत्नीने गळफास घेऊन आत्महत्या केली. तर सर्वच प्रकार आपल्या अंगलट येणार या भीतीने प्रियकारानेही आत्महत्या केल्याचा धक्कादायक प्रकार खरोळा गावात घडलाय.

लातूर : अनैतिक संबंधामुळे संसाराची कशी राखरांगोळी होती याचे जिवंत उदाहरण रेणापूर तालुक्यातील खरोळा गावात समोर आले आहे. संसार पतीबरोबर आणि अनैतिक संबंध दुसऱ्या बरोबर असल्याचा धक्कादायक प्रकार समोर आला होता. यातून पत्नीने प्रियकराच्या मदतीने पतीचा तर काटा काढल्याचा प्राथमिक अंदाज पोलिसांनी वर्तवला आहे. पण मनातील घालमेल आणि बैचेनी पत्नीला देखील स्वस्थ बसू देत नव्हती त्यामुळे पत्नीने गळफास घेऊन आत्महत्या केली. तर सर्वच प्रकार आपल्या अंगलट येणार या भीतीने प्रियकारानेही आत्महत्या केल्याचा धक्कादायक प्रकार खरोळा गावात घडलाय.

सात हजार लोकसंख्या असलेलं खरोळा हे रेणापूर तालुक्यातील गाव. गेल्या 12 दिवसांत या गावात दोघांच्या आत्महत्या तर एका तरुणाचा मृतदेह कोरड्या विहिरीत आढळला होता. मात्र, तपासाअंती प्रेमाचा त्रिकोण आणि तिन्हीही घटनेमागील सत्य समोर आले आहे. लखन राऊतराव आणि त्याची पत्नी मनीषा हे गावातच एकत्र कुटुंबात राहत होते. 27 मे रोजी मनीषा हिने गळफास घेऊन आत्महत्या केल्याची घटना घडली होती. याप्रकरणी तिच्या वडिलांच्या फिर्यादीनुसार पती लखन राऊतराव यांच्यासह सासू- सासरे आणि दिरावर गुन्हा दाखल करण्यात आला होता. यामध्ये दोघांना अटक करण्यात आली होती तर पती लखनचा शोध सुरू होता.

दरम्यान, गावातीलच विजयकुमार छपरे याला चौकशीकरता रेणापूर पोलीस ठाण्यात आणले होते. मात्र, लघुशंकेचा बहाणा करुन विजय ठाण्याच्या बाहेर आला. त्यानंतर थेट घरी जाऊन त्यानेही आत्महत्या केली. त्यामुळे या दोन्ही आत्महत्या आणि बेपत्ता असलेला लखन राऊतराव याचा काही संबंध तर नाहीना त्या अनुषंगाने शोध सुरू केला असता लखनचा मृतदेह गावाजवळच्या कोरड्या विहिरीत आढळून आला. एका पोत्यामध्ये हात-पाय बांधलेल्या अवस्थेत हा मृतदेह होता. त्यामुळे अनैतिक संबंधास अडथळा होत असलेल्या लखनचा काटा पत्नी मनीषा आणि विजयकुमार छपरे यांनी काढला आणि त्यालाच आरोपीच्या पिंजऱ्यात उभे केले. या घटनेने बैचेन असलेल्या मानिषाने गळफास घेऊन आत्महत्या केली तर हा सर्व प्रकार अंगलट येणार म्हणून विजय छपरे यानेही आत्महत्या केली आहे. यासंबंधी लखनचे मामा यांच्या फिर्यादीवरून रेणापूर पोलीस ठाण्यात गुन्हा दाखल झाला आहे. शिवाय मनीषा आणि विजयला आणखीन कुणी मदत केली का याचा शोध सुरू असल्याचे माहिती रेणापुर पोलिस ठाण्याचे पी आय गोरख दिवे यांनी सांगितले आहे.