Kalyan: हजार रुपयांवरुन वाद, गॅरेज मेकॅनिकवर जीवघेणा हल्ला

आधीची बाकी दे असं सांगत गाडी वॉशिंग सेंटरमधील दोन तरुणांनी गॅरेज मेकॅनिकला मारहाण केल्याची घटना घडली आहे. 

Kalyan Crime

कल्याण: केवळ हजार रुपयांच्या वादातून एका गॅरेज मेकॅनिकवर चाकूने हल्ला करत त्याला जखमी केल्याची धक्कादायक घटना कल्याण पश्चिममध्ये घडली. ही घटना सीसीटीव्ही कॅमेरात कैद झाली आहे. या प्रकरणी खडकपाडा पोलिसांनी तीन जणाच्या विरोधात गुन्हा दाखल केला आहे. हसन खोत असं जखमी कर्मचाऱ्याचं नाव असून त्याच्यावर मुंबई येथील शासकीय रुग्णालयात उपचार सुरू आहेत. या प्रकरणी एका आरोपीला अटक करण्यात आली असून त्याचे अन्य दोन साथीदार फरार आहेत.

काय घडलं?

गॅरेज मेकॅनिकवर चाकूने हल्ला करणाऱ्या सागर माळवे याला पोलिसांनी अटक केली असून त्याच्या दोन फरार साथीदारांचा शोध सुरू आहे. कल्याण पश्चिमेतील वाडेघर परिसरात असलेल्या एका गॅरेजमध्ये हसन खोत हा तरुण मकेनिक म्हणून काम करतो. या गॅरेजच्या शेजारी गाड्यांचे वॉशिंग सेंटर आहे. काही दिवसापूर्वी गॅरेजमधील एक गाडी घेवून हसन बाजूच्या वॉशिंग सेंटरमध्ये गेला. हसनने गाडी धुण्यासाठी उभी केली, मात्र याच वेळी सागर माळवे हा तिथे आला आणि त्याने आधीचे एक हजार रुपये बाकी आहेत, ते आधी दे असं हसनला सांगितलं. यावर हसनने माझा मालक पैसे देईल असे सांगितले. मात्र याच दरम्यान दोघांमध्ये वाद झाला. 

याच वादातून संतापलेल्या सागर आणि त्याच्या दोन साथीदारांनी हसनला बेदम मारहाण केली. सागरने हसनवर चाकूने हल्ला केला. हसन या हल्ल्यात गंभीर जखमी झाला असून त्याला उपचारासाठी मुंबई येथील रुग्णालयात दाखल करण्यात आला आहे. ही संपूर्ण घटना सीसीटीव्ही कॅमेऱ्यात कैद झाली असून या प्रकरणी खडकपाडा पोलीस ठाण्यात सागर माळवे आणि त्याच्या दोन साथीदारांच्या विरोधात गुन्हा दाखल करण्यात आला आहे. पोलिसांनी सागर माळवे याला अटक केली आहे. मारहाण करणारे त्याचे दोन साथीदार फरार असून त्यांचा शोध सुरू असल्याची माहिती खडकपाडा पोलीस ठाण्याचे वरिष्ठ पोलीस निरीक्षक अशोक पवार यांनी दिली.