जालन्यात संतापजनक प्रकार! क्रीडा प्रबोधनीत चार विद्यार्थिनींचा विनयभंग, क्रीडा शिक्षकाला अटक
Jalna crime: याप्रकरणी क्रीडा शिक्षकाला अटक करण्यात आली आहे. पोक्सो अंतर्गत गुन्हा दाखल करण्यात आला असून जालना पोलीस अधिक तपास करत आहेत.
Jalna crime: बीडमध्ये कोचिंग क्लासमधील अल्पवयीन मुलीवर झालेलं अत्याचार प्रकरण ताजे असताना जालना शहरातून एक धक्कादायक आणि संतापजनक घटना समोर आली आहे. शहरातील गांधी चमन परिसरात असलेल्या क्रीडा प्रबोधनीमध्ये कार्यरत असलेल्या क्रीडा शिक्षकावर चार विद्यार्थिनींच्या विनयभंगाचा आरोप झाला आहे. या प्रकरणी जालन्यातील कदीम पोलीस ठाण्यात गुन्हा दाखल करण्यात आला असून पोलिसांनी आरोपी क्रीडा शिक्षकाला अटक केली आहे.
प्रमोद खरात असं या संशयित आरोपी क्रीडा शिक्षकाचे नाव असून पोलिसांनी काल रात्री संशयित आरोपी शिक्षकाला बेड्या ठोकल्या आहे.
नेमकं काय घडलं?
गांधी चमन भागातील क्रीडा प्रबोधनीमध्ये नियमितरित्या क्रीडा प्रशिक्षण घेत असलेल्या विद्यार्थिनींना त्यांच्या प्रशिक्षकाने म्हणजेच क्रीडा शिक्षक प्रमोद खरात याने वारंवार छळ केल्याचे समोर आले आहे. पीडित मुलींनी संबंधित शिक्षण विभागाकडे तक्रार केली. याची गंभीर दखल घेत गटशिक्षण अधिकारी यांनी पोलीस ठाण्यात फिर्याद दिली.
पोस्को अंतर्गत गुन्हा दाखल, पोलिसांकडून चौकशी सुरू
या प्रकरणी क्रीडा शिक्षक प्रमोद खरात याच्याविरोधात पोक्सो कायद्यासह (Protection of Children from Sexual Offences Act) विविध गंभीर कलमांखाली गुन्हा दाखल करण्यात आला आहे. पोलिसांनी तात्काळ कारवाई करत आरोपीला काल रात्री अटक केली. सध्या तो पोलिसांच्या कोठडीत असून तपास सुरू आहे.
इतर विद्यार्थिनींवरही गैरवर्तनाची शक्यता?
ही केवळ चार विद्यार्थिनींची तक्रार नसून आणखी कोणी पीडित आहे का, याचा तपास पोलीस करत आहेत. क्रीडा प्रबोधनीमध्ये शिकणाऱ्या इतर विद्यार्थिनींशीही शिक्षकाने अशाच स्वरूपाचं वागणूक दिली आहे का, यासाठी पोलीस सर्व विद्यार्थिनींचे जबाब नोंदवत आहेत. तसेच, घटनास्थळी फॉरेन्सिक पथक आणि बालकल्याण समितीनेही भेट देऊन चौकशी सुरू केली आहे.
शहरात संतापाची लाट, शिक्षण विभाग सतर्क
या घटनेमुळे जालना शहरात संतापाची लाट उसळली आहे. पालकांनी आपल्या मुलींच्या सुरक्षेबाबत चिंता व्यक्त केली आहे. जालना क्रीडा प्रबोधिनी शिक्षण विभागानेही घटनेची गंभीर दखल घेत प्रकरणाची सखोल चौकशी करून दोषींवर कठोर कारवाई करण्याचे संकेत दिले आहेत.
महत्त्वाच्या बातम्या
