मैत्रिणीची रेकी मित्रांचा डाका.. सांगलीत वृद्ध महिला डॉक्टरच्या घरावर दरोडा टाकणाऱ्या पाच जणांना अटक

सांगली शहरातील वृद्ध महिला डॉक्टरच्या घरावर दरोडा (robbing) टाकणाऱ्या पाच जणांना अटक पोलिसांनी अटक केली आहे.

सांकेतिक छायाचित्र

सांगली : सांगलीत मैत्रिणीच्या सांगण्यावरून एका मित्राने आपल्या तीन मित्रांच्या मदतीने वयोवृद्ध डॉक्टर महिलेच्या घरात दरोडा टाकला होता. 5 सप्टेंबर रोजी ही चोरीची घटना घडली होती. घरात घुसून वृद्ध डॉक्टर महिलेच्या गळ्याला चाकू लावून हा धाडसी दरोडा टाकला होता. याप्रकरणी    विश्रामबाग पोलिसांनी आता पाच जणांना अटक केली आहे. यात एका महिलेचाही सहभाग आहे. या पाच जणांकडून एकूण 7 लाख 42 हजार 600 रुपयांचा मुद्देमाल जप्त करण्यात आला आहे. 

ज्या मैत्रिणीच्या सांगण्यावरून ही चोरी करण्यात आली. त्या घरात ती मैत्रीण आपल्या एका मित्रासोबत आजाराचे कारण करून गेली होती. त्यावेळी त्या वृद्ध महिला डॉक्टरने आपण आता रुग्ण तपासात नाही असे सांगून त्यांना परत पाठवले. पण याच वेळी त्यांनी घरात कोण कोण राहते याची रेकी केली आणि दरोडा टाकण्याचा प्लॅन ठरवला. या दरोड्याच्या कारवाईत पोलिसांनी चोरीतील सोन्याचे दागिने, रोख रक्कम, गुन्हा करण्यासाठी वापरलेले 5 मोबाईल, 4 दुचाकी वाहने आणि एक कोयता असा एकूण 7 लाख 42 हजार 600 रुपयांचा मुद्देमाल जप्त केला आहे.

सांगलीतील विश्रामबाग परिसरात राहणाऱ्या प्रसिद्ध डॉक्टर नलिनी नाडकर्णी यांच्या घरात घुसून चाकू गळ्याला लावू दरोडा टाकल्याची घटना सात दिवसांपूर्वी घडली होती. या प्रकरणी विश्रामबाग पोलिसांनी पाच जणांना अटक केली आहे. अटकेतील पाच जणांकडून 5 लाख 97 हजारांचे दागिने, 37 हजारांचा मोबाईल, 8 हजार रुपये रोख असा एकूण 7 लाख 42 हजार 600 रुपयांचा मुद्देमाल जप्त केला आहे. अमित चंद्रकांत पाचोरे, सचिन शिवाजी फोंडे, रोहित देवगोंडा पाटील, निखिल राजाराम पाटील आणि पायल युवराज पाटील अशी अटक केलेल्या संशयितांची नावं आहेत. पायल आणि तिचा मित्र निखील यांनीच कट रचून दरोड्याचा गुन्हा घडवून आणल्याचे तपासात स्पष्ट झाले आहे. 

5 सप्टेंबर रोजी दुपारी साडेतीन वाजण्याच्या सुमारास डॉ. नलिनी नाडकर्णी घरामध्ये एकट्या असताना तिघांनी त्यांच्या घरात प्रवेश केला. डॉ. नलिनी यांच्या गळ्याला धारदार कोयता लावून जीवे मारण्याची धमकी देत 25 तोळे सोने आणि रोख रक्कम लुटली होती. गुन्हा घडलेल्या ठिकाणी कोणताही पुरावा मिळू नये यासाठी आरोपींनी सर्व पुरावे नष्ट केले होते. त्यामुळे या प्रकरणी तपास करणे पोलिसांपुढे आव्हान होते. विश्रामबाग पोलीस ठाण्याच्या गुन्हे प्रकटीकरण शाखेचे सहायक पोलीस निरीक्षक अमितकुमार पाटील हे तपास करत असताना त्यांना माहिती मिळाली की, नलिनी नाडकर्णी यांच्यकडे पायल ही आपल्या मित्रांसोबत आजाराचे कारण करून गेली होती. त्याचवेळी घराची रेकी करत पायल पाटील हिने तिचा मित्र निखील पाटील याच्यासोबत कट रचून घरात दरोडा टाकण्याचे ठरविले. यासाठी त्यांनी पाचोरे, फोंडे आणि रोहित पाटील यांची मदत घेतली. त्यावरून नांद्रे, वसगडे, खटाव आणि सांगली येथे छापा टाकून पाच जणांना अटक केली. पाच जणांकडे पोलिसांनी कसून चौकशी केल्यानंतर सर्वांनी मैत्रिणीच्या सांगण्यावरून गुन्हा केल्याची कबुली दिली. या पाचही जणांकडून पोलिसांनी चोरीतील सोन्याचे दागिने, रोख रक्कम, गुन्हा करण्यासाठी वापरलेले 5 मोबाईल, 4 मोटारसायकली आणि एक कोयता असा एकूण 7 लाख 42 हजार 600 रुपयांचा मुद्देमाल जप्त केला आहे.