Dombivli : सिलेंडरमधून गॅस चोरणारे दोघे अटकेत, लोखंडी पिन आणि पाईपच्या सहाय्याने करायचे गॅस चोरी 

डोंबिवली मानपाडा पोलिसांनी सिलेंडरमधून गॅस चोरी करणाऱ्या दोघांना अटक केली आहे. या सिलेंडरचे दुप्पट किमतीत विक्री करत त्याचा काळाबाजार केला जात होता.

डोंबिवली

डोंबिवली: सिलेंडरमधून गॅस चोरुन तो गरजू लोकांना दुप्पट किंमतीत विकणाऱ्या दोघांना डोंबिवली मानपाडा पोलिसांनी अटक केली आहे. हे दोघे लोखंडी पिन आणि पाईपच्या सहाय्याने भरलेल्या गॅस सिलेंडरमधून काही प्रमाणात गॅस चोरी करत रिकाम्या गॅस सिलेंडरमध्ये रीफिल करायचे आणि गरजू लोकांना दुप्पट किमतीत विक्री करायचे. बाळप्पा उनगप्पा ईरगदिन आणि महेश गुप्ता असे अटक आरोपीचे नाव आहे.

गेल्या वर्षभरात घरगुती गॅस सिलेंडरने हजारी ओलांडली तर कमर्शियल गॅस सिलेंडर देखील दोन हजारांच्या घरात पोहचलाय. त्यामुळे नागरिक त्रस्त झाले असताना आता गॅस सिलेंडरच्या काळ्या बाजारामुळे कमी वजनाचे गॅस नागरिकांच्या माथी मारले जात असल्याचा धक्कादायक प्रकार डोंबिवलीत उघड झाला आहे. बेकायदेशीररित्या गॅस सिलेंडरची रीफिलिंग करणाऱ्या दोन आरोपींच्या मानपाडा पोलिसांनी मुसक्या आवळल्या आहेत. डोंबिवली जवळ असलेल्या हेदुटणे गावात धोकादायक पद्धतीने हा काळाबाजार चोरी छुपे सुरु होता. 

डोंबिवली जवळील हेदुटने शिरढोन रोडवर एका वीटभट्टीच्या मागे गॅस सिलेंडरमधून गॅस चोरी होत असल्याचे फोटो काही दिवसांपूर्वी समाज माध्यमावर व्हायरल झाले होते. मानपाडा पोलीस ठाण्याचे वरिष्ठ पोलीस निरीक्षक शेखर बागडे यांच्या मार्गदर्शनाखाली सहाय्यक पोलीस निरीक्षक सुर्यवंशी यांच्या पथकाने घटना स्थळी धाव घेत छापा टाकला. 

या ठिकाणी प्राप्त झालेली माहिती आणि फोटोच्या माध्यमातून तपास करीत टेम्पो चालक विनोदकुमार रामशब्द यादव याला सोनारपाडा येथून ताब्यात घेतलं. त्याने महेश गुप्ता याला भारत गॅस सिलेंडरची वाहतूक करण्यासाठी टेम्पो दिला होता. तो गॅसचा काळाबाजार करत असल्याचं माहीत झाल्याने त्याने महेश कडून टेम्पो परत घेतला होता. यादव याच्याकडून महेशची माहिती घेत पोलिसांनी डोंबिवलीतून महेश आणि बाळप्पा यांना ताब्यात घेतले. त्यांच्याकडून 12 घरगुती  सिलेंडर आणि दोन मोबाईल जप्त करण्यात आले. तर या काळ्या बाजार आणखी काही जणांचा सहभाग असण्याची शक्यता असून त्या दृष्टीने पोलिसांनी पुढील तपास सुरू केला आहे.