Dhule Crime : धुळ्यात भयंकर घटना! साक्रीत पतीने पत्नी अन् तीन वर्षांच्या मुलाला दगडाने ठेचून मारले; स्वतःवरही केला जीवघेणा हल्ला
Dhule Sakri Case : धुळे जिल्ह्यातील साक्री तालुक्यातील अष्टाणे येथे धक्कादायक घटना घडली आहे. पतीने पत्नी आणि तीन वर्षांच्या चिमुकल्या मुलाला दगडाने ठेचून निर्घृणपणे संपवलं आहे.
धुळे : धुळे जिल्ह्यातील साक्री तालुक्यातील अष्टाणे येथे एक अत्यंत भयानक आणि धक्कादायक घटना उघडकीस आली आहे. कौटुंबिक वादातून पतीने आपल्या 24 वर्षांच्या पत्नीला आणि अवघ्या तीन वर्षांच्या चिमुकल्या मुलाला दगडाने डोक्यात मारून निर्घृणपणे संपवलं. रविवारी संध्याकाळी घडलेल्या या घटनेमुळे संपूर्ण धुळे जिल्ह्यात एकच खळबळ उडाली आहे. नागेश ठाकरे (वय 33) असे या दुहेरी हत्याकांडातील संशयित आरोपी पतीचे नाव असून, त्याची पत्नी बाईचीबाई ठाकरे (वय 28) आणि मुलगा रोहित ठाकरे (वय 3) अशी मृतांची नावे आहेत.
Sakri Case : खरेदीवरून परतताना पेटला वाद
मिळालेल्या प्राथमिक माहितीनुसार, ठाकरे कुटुंब ऊसतोडीच्या कामासाठी बाहेर पडणार होते. ऊसतोडीला जाण्यापूर्वी साक्री येथील आठवडे बाजारातून खरेदी करून हे कुटुंब घरी परतत होते. त्यावेळी वाटेतच पती नागेश आणि पत्नी बाईचीबाई यांच्यात अचानक जोरदार वाद झाला. या वादातून संतापाच्या भरात नागेशने रस्त्यावरील मोठा दगड उचलून थेट पत्नीच्या डोक्यात घातला. यामध्ये पत्नीचा जागीच मृत्यू झाला.
Crime News Marathi : 3 वर्षांच्या चिमुकल्यालाही सोडले नाही
पत्नीची हत्या केल्यानंतर नराधम नागेशचा राग शांत झाला नाही. त्याने आपल्या अवघ्या 3 वर्षांच्या निष्पाप मुलावरही दगडाने भीषण हल्ला केला. या हल्ल्यात गंभीर जखमी झालेल्या चिमुकल्या रोहितचाही जागीच करुण अंत झाला. घटनेच्या वेळी वाद सोडवण्यासाठी पुढे आलेल्या काही स्थानिक नागरिकांवरही आरोपीने दगडाने हल्ला करण्याचा प्रयत्न केला, ज्यामुळे परिसरात भीतीचे वातावरण निर्माण झाले होते.
Dhule Crime Investigation : आरोपी पती धुळ्यात उपचारासाठी दाखल
पत्नी आणि मुलाची निर्घृण हत्या केल्यानंतर आरोपी नागेश ठाकरे याने स्वतःच्या डोक्यातही दगडाने घाव घालून जीवन संपवण्याचा प्रयत्न केला. या घटनेची माहिती मिळताच पोलिसांनी तातडीने घटनास्थळी धाव घेतली. गंभीर जखमी झालेल्या आरोपी नागेशला पोलिसांनी ताब्यात घेऊन उपचारासाठी धुळे येथील शासकीय रुग्णालयात दाखल केले आहे. याप्रकरणी पोलीस अधिक तपास करत असून कौटुंबिक वादाचे नेमके कारण काय होते, याचा शोध घेतला जात आहे.
ही बातमी वाचा:
महत्त्वाच्या बातम्या
