Dhule ACB Trap : 'पाच हजार द्या, अन्यथा बिल थांबवेन'; ज्वारी खरेदीच्या पावतीसाठी लाच मागितली, धुळ्याचा पुरवठा निरीक्षक एसीबीच्या जाळ्यात
Supply Inspector Arrest : शेतकऱ्याच्या ज्वारीचा दर्जा चांगला दाखवून मोजणी करून घेण्यासाठी आणि ऑनलाइन बिल प्रक्रियेत कोणताही अडथळा येऊ नये यासाठी लाच मागण्यात आली होती.
Dhule Supply Inspector Arrest : धुळे तहसील कार्यालयातील पुरवठा निरीक्षक तथा शासकीय गोदाम व्यवस्थापकाला 5 हजार रुपयांची लाच स्वीकारताना लाचलुचपत प्रतिबंधक विभागानं (ACB) रंगेहात पकडले आहे. मनिष महेश बागुल (वय 30) असं अटक करण्यात आलेल्या भ्रष्ट अधिकाऱ्याचं नाव आहे.
ऑनलाइन बिल प्रक्रिया पुढे सरकवण्यासाठी शेतकऱ्याकडे लाचेची मागणी करून ती स्वीकारल्याप्रकरणी एसीबीच्या पथकाने ही धडक कारवाई केली. या कारवाईमुळे धुळे महसूल विभागात आणि शासकीय कर्मचाऱ्यांमध्ये प्रचंड खळबळ उडाली आहे. आरोपी मनिष बागुल याच्याविरुद्ध धुळे शहर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.
लाचलुचपत प्रतिबंधक विभागाने दिलेल्या अधिकृत माहितीनुसार, या प्रकरणातील तक्रारदार शेतकरी हे धुळे तालुक्यातील अंचाडे गावचे रहिवासी आहेत. तक्रारदार शेतकरी आणि त्यांच्या पत्नीने स्वतःच्या शेतात पिकवलेली ज्वारी महाराष्ट्र शासनाच्या किमान आधारभूत किंमत योजनेअंतर्गत (MSP) विक्रीसाठी ऑनलाइन नोंदणी केली होती. शासनाच्या नियमानुसार, नोंदणी झाल्यानंतर ते आपली ज्वारी विक्रीसाठी धुळे येथील शासकीय गोदामात घेऊन आले होते.
Dhule Bribery Case : ज्वारीचा दर्जा चांगला दाखवण्यासाठी मागितली लाच
शासकीय गोदामात आणलेल्या ज्वारीच्या मालाची रीतसर मोजणी करून तक्रारदार शेतकऱ्याला पावत्या देण्यात आल्या होत्या. मात्र, तिथला ऑनलाइन बिलाचा तांत्रिक ताबा असलेला पुरवठा निरीक्षक मनिष बागुल याने शेतकऱ्याला बाजूला बोलावलं. शेतकऱ्याच्या ज्वारीचा दर्जा चांगला दाखवून मोजणी करून घेण्यासाठी आणि ऑनलाइन बिल प्रक्रियेत कोणताही अडथळा येऊ नये यासाठी त्याने 5 हजार रुपयांची लाच मागितली. जर लाच दिली नाही, तर बिल प्रक्रिया पुढे जाऊ देणार नाही, अशी धमकीही बागुलने शेतकऱ्याला दिली होती.
ACB Trap Dhule : एसीबीच्या पथकाने रचला सापळा; लाचखोर रंगेहात जेरबंद
शासकीय कामासाठी लाच देण्याची इच्छा नसल्याने सतर्क शेतकऱ्याने त्याच दिवशी थेट लाचलुचपत प्रतिबंधक विभाग, धुळे कार्यालयात जाऊन रीतसर तक्रार नोंदवली. शेतकऱ्याच्या तक्रारीवरून एसीबीच्या पथकाने तात्काळ प्रकरणाची पडताळणी केली. या पडताळणीदरम्यान आरोपी मनिष बागुल याने पंचांसमक्ष 5 हजार रुपयांची लाच मागितल्याचं आणि ती स्वीकारण्यास होकार दिल्याचं निष्पन्न झालं.
लाचेची मागणी सिद्ध होताच एसीबीच्या अधिकाऱ्यांनी गोदामातच सापळा रचला. ठरल्याप्रमाणे शेतकरी पैसे देण्यासाठी गेला असता, मनिष बागुल याने 5 हजार रुपयांची लाचेची रक्कम स्वतःच्या हाताने स्वीकारली. त्याच क्षणी दबा धरून बसलेल्या एसीबीच्या पथकाने झडप घालून त्याला रंगेहात अटक केली.
या यशस्वी कारवाईनंतर आरोपी पुरवठा निरीक्षक मनिष बागुल याला ताब्यात घेण्यात आलं असून, त्याच्यावर धुळे शहर पोलीस ठाण्यात गुन्हा दाखल करण्याची प्रक्रिया पूर्ण झाली आहे. शासकीय खरेदी केंद्रांवर शेतकऱ्यांची होणारी अडवणूक या कारवाईमुळे पुन्हा एकदा समोर आली आहे.
ही बातमी वाचा:
महत्त्वाच्या बातम्या
