दारू तस्करांचा जुगाड, एलपीजी सिलेंडरमध्ये दारू ; पाहा व्हिडिओ
Crime News : बेकायदेशीरपणे दारूची तस्करी करणाऱ्या तस्कराचा जुगाड पाहून पोलीसही चक्रावले. चक्क एलपीजी सिलेंडरमधून दारूची तस्करी करण्यात येत होती.
पाटणा: बिहारमध्ये दारूबंदी लागू करण्यात आली आहे. तरीदेखील बेकायदेशीरपणे मद्यविक्री मोठ्या प्रमाणावर होत असल्याचे दिसून येते. बिहारमध्ये दारू तस्करांकडून दारूची तस्करी करण्यासाठी वेगवेगळे पर्याय अवलंबले जात आहेत. अशीच एक घटना समोर आली आहे. दारू तस्करांनी थेट एलपीजीच्या सिलेंडरमध्ये दारूच्या बाटल्या लपवल्याचे उघडकीस आले आहे.
दारू तस्करांनी केलेला हा जुगाड पाहून पोलिसही चक्रावले आहेत. मंगळवारी पाटणामध्ये पीरबहोर पोलीस ठाण्यात पोलिसांनी एका दारू तस्काराला अटक केली. त्याच्याजवळून 44 लीटर देशी दारू जप्त करण्यात आली. कोणालाही संशय येऊ नये असा जुगाड या दारू तस्कराने केला होता. दारू तस्करी करणारा भूषण एलपीजी सिलेंडरमध्ये देशी दारू घेऊन पाटणा येथे जात होता. एलपीजी सिलेंडर उलटा केल्यानंतर त्यात दारूच्या बाटल्या ठेवता येतील अशी त्याची रचना केली होती.
तेरे जुगाड़ का जवाब नहीं! वीडियो में देखिए पटना के पीरबहोर थाना पुलिस ने सिलेंडर में छिपाकर लाई जा रही देसी शराब बरामद की. तस्करों का दिमाग देखकर आपका सिर चकरा जाएगा... फिलहाल बिहारी स्टाइल वाले जुगाङ तकनीक को सलाम कीजिए.खबर Edited by अजीत कुमार pic.twitter.com/ppA96wsk8W
— Prakash Kumar (@kumarprakash4u) April 13, 2022
अटक करण्यात आलेला आरोपी दारू तस्कर भूषण हा सोनपूर येथे राहणार आहे. पोलिसांकडून आरोपी भूषणची कसून चौकशी सुरू आहे. मागील किती दिवसांपासून हे काम करत आहे, आणखी किती जणांचा सहभाग आहे, आदी चौकशी पोलिसांकडून सुरू आहे. पीरहबोर पोलीस ठाण्याचे प्रमुख सबीह उल हक यांनी सांगितले की, पोलिसांना दारूची तस्करी होत असल्याची माहिती मिळाली होती. त्यानंतर सोनपूर येथून एका नावेतून एक व्यक्ती उतरली. तिची हालचाल संशयास्पद वाटली.
या व्यक्तीने गोणीमध्ये गॅस सिलेंडर ठेवला होता. पोलिसांनी या घरगुती एलपीजी गॅस सिलेंडरची तपासणी केली. सिलेंडरच्या खालील बाजूस झाकण लावण्यात आले होते. हे झाकण उघडल्यानंतर पोलिसांना शीतपेयांच्या प्लास्टीकच्या बाटलीत देशी दारू असल्याचे आढळून आले. पोलिसांनी एकूण 44 लीटर दारू जप्त केली आहे.
महत्त्वाच्या बातम्या
